Tura, Jylliew 12 : U Myntri Rangbah ka jylla u Conrad K Sangma ha ka Sngi Saitjaiñ u la leit jngoh da lade ïa u kpa u Sengrik D Sangma bad ïa u khun ba dang rit kiba la mynsaw jur na ka jingtwa khyndew bad ban ïa ka iing jongki kaba la jia ha ka shnong Jebalgre, kaba hap hapoh ka Gambegre Block, West Garo Hills. U Myntri Rangbah u la ai ruh ïa ka song jingiarap kaba 12 lak sha katei ka longïing lyngba u kpa. Une u kpa bad u khun ki dang shah sumar ha Civil Hospital Tura haduh mynta.
Kane ka jingjia ka la jia ha ka 9 tarik Jylliew 2022 namar ka jingther u lap bah ha ri lum Garo bad ha kane ka jingjia ka kmie ka Pritish Ch Marak kaba 37 snem ka rta bad arngut ki khun rit ki la khlad noh katba une u kpa bad une uwei u khun ki dang don hapdeng ka jingshah sumar ha Tura Civil Hospital.
Na ka liang u Myntri Rangbah ha katei ka jingleit jngoh ula pynpaw ka jingsngewlem ha u kpa halor kane ka jingjia kaba ka ïing ka la ïakynduh namar ka la duh haduh lai ngut ki mynsiem briew bad ai artat ïa katei ka song jingïarap.
Ha kane ka jingther u lapbah ha ri lum Garo bun phew tylli ki shnong ki la shah ktah bad shah tyllep ha ka um bad bun ruh ki surok ki la julor jur.
Na ka liang u Myntri Rangbah u la hiar sha ri lum Garo ha ka Sngi Thohdieng hi bad u khot kyrkieh ïa ka jingïalang ïa baroh ki ophisar bad ki DC, SP ban ïakren halor kane ka jingshlei um. Na ka liang ki ophisar, ki DC bad SP ki la pyntip sha u Myntri Rangbah ïa ki jaka ba shah ktah jur. Na ka liang u Myntri Rangbah u la kyntu ïa ki ophisar khamtam jong ka tnad bor ding bad PWD ba kin peit ba ki briew kin ïoh kloi ïa ka bor ding bad kumjuh ruh ïa ki engineer ba kin peit ba ki surok kin lait noh ban ïaid kali khnang ba kan ym ktah ïa ka ïaid ka ïeng ki paidbah. U Myntri Rangbah u la bthah ruh ïa ki DC bad SP ba kin peit bad pynbiang ïa ki mar bam mar dih bad ki umdih sha kito ki long ïing kiba shah ktah bad hap ban kynriah noh na la ki ïing ki sem jongki.
U la kyntu ruh ïa ki DC ba kin peit ïaki jaka kiba biang bad shngaiñ ban thaw ïa ki ïing ba ki paidbah kin ïoh ban rieh tngen ha ka por ba wan u lap bah ha ki thaiñ thor jongka ri lum Garo. Namar kane ka jingshlei um ka jia beit man la u snem na ka daw ka jingshlei um jongka wah Brahmaputra bad shah ktah ka ri lum Garo.
