Shillong, Naitung 10: Ka prokram Khelo India Rising Talent Identification (KIRTI-MyBharat) ban wad khynnah lehkai kiba don sap (talent hunt) kan long ha ka 12 bad 13 tarik Naitung, 2024, ha Maharam Govt Higher Secondary School Mawkyrwat.
Ha kane ka KIRTI-MyBharat Prokram yn bishar bñiah ïa ki samla kiba dang khie san bad ban ailad ïa ki ban shah hikai ha ki jaka ïalehkai kiba thymmai kiba don ha kylleng ka ri India.
Kane ka jingwad khynnah ba don sap kan long ha ka ATHLETICS, ARCHERY & FOOTBALL, ha kaba yn bishar bñiah naduh ka koit ka khiah bad ka jinglong kynsai jong ki ha ki jingïalehkai ba ki ïashimbynta.
Ka jingpynrung kyrteng na ka bynta ka talent hunt prokram kan long naduh ka por 9 baje mynstep haduh 1 baje mynsngi, bad ka jingbishar bñiah kan long haduh ka por 6 baje nohphaisngi ha baroh ar sngi.
