119.44 klur ka tender pynbna ka AAI ban shna pynheh ïa ka kad liengsuiñ ha Umroi

Shillong, Ïaiong 05 : Ka Meghalaya ka la lah ban wanrah ïa ka kam pynroi kaba kham pher mynta ka kynti haba ïadei bad ka jingpynïasoh ïaka jylla ha ka leit ka wan hadien ba ka Airports Authority of India (AAI) ka la pyllait ïa ka tender notice na kabynta ban pynheh noh ïa ka Shillong Airport kaba ju tip kum ka Kad Liengsuin Umroi.
Kane ka sienjam ka wan kum u soh ka jingïai buddien kaba khlem sangeh jong u Myntri Rangbah ka Jylla u Conrad K. Sangma, u ba la ïai bteng ban buddien khlem sangeh da kaba buh hakhmat eh ban pynbha ïa ka leit ka wan lyngba ki liengsuin, hapoh ka thong treikam jong ka sorkar jong u.
Kane ka jingpynheh ïa ka kad liengsuin ka kynthup ïa ka jingpynheh shuh sa 571 metre na ka runway kaba la don lypa kaba pynlong ïa kane ka kad liengsuin ban don ïa ka jingjrong kaba haduh 2400 metre., da kaba pynpoi ïa ka jingjrong baroh sha ka 2,400 meter. Kane kan pynsuk ruh ïa ka jingpynïaid ïa ki liengsuin A-320 type ha Shillong. Nalor kata, kane ka projek ka kynthup ïa ka jingpynheh terminal building lane ka jaka rung jaka mih jong ki paidbah ha ka kad liengsuin nalor kiwei kiwei ki jingtrei kiba ïadei bad kane ka airport.
Katkum ka jingkhot tender, ka jinglut jingsep jong kane ka projek kaba heh ka la kot sha ka 11,944.47 lak (T.119.44 klur), bad ka por ba la khmih lynti ban pyndep ka long 18 bnai, kynthup ïa ki lai bnai ba la pynjlan na ka daw ka aiom slap).
Halor kane, u Myntri Rangbah ka Jylla Conrad K. Sangma u la ong, “Kane ka dei ka khyllipmat kaba nga da sngewhun bad don ka jingkyrmen kaba khraw na ka bynta ka Jylla Meghalaya.
Ka jingpynmih ïa ka tender ban pynheh ïa ka kad liengsuin jong ka Shillong ka dei ka jingmih na ka jingpyrshang kaba ïai bteng jong ngi ha kine ki katto katne snem ba la leit noh. Ka jingpynbha shuh shuh ïa ka leit ka wan lyngba ki liengsuin kam dei tang ka jingsuk- ka dei ka jingpynkylla ïa ka jingim, ka jingkyntiew ïa ka kam jngohkai pyrthei, ka jingkhring ïa ki nongbei tyngka bad ka jingthaw ki lad ki lynti na ka bynta ki samla jong ngi.”
Shuh shuh u ong ruh ba hadien ba la dep kane ka projek, da ka jing pyrshang jong ka sorkar ban kyntiew ïa ka jingïadei bad ki kam jngohkai pyrthei ha ka jylla kan long ka jingkylla na ka bynta ki paidbah ka Meghalaya.
Naduh ba u la shimti ïa ka kam, u Myntri Rangbah ka Jylla u Conrad K Sangma u la ïai bteng ban rah ïa ka mat ban pynheh ïa ka kad liengsuiñ jong ka Shillong ha ka sorkar pdeng ha ki kyrdan bapher bapher. Ïa kane ka projek la shim kum u mawjam jong ka jingangnud jong ka Meghalaya ban kyntiew kum ka jaka jngohkai pyrthei bad ka jaka bei tyngka kaba kongsan ha ka ri.
Ka AAI ka la aiti ïa ka draft master plan na ka bynta ban pynheh ïa kane ka kad liengsuin ha u bnai Nailar 2024, bad ka jingshim jaka na ka bynta ka jingpynheh shuh shuh kaba 22 akar kaba donkam na ka bynta katei ka projek ka la ïaid shakhmat.
Ka jingpynheh ïa ka kad liengsuin jong ka Shillong la khmih lynti ba kan ïarap ïa ka jingpyniasoh ïa ki sor kiba heh ha kylleng ka ri India kaba plie lad na ka bynta ka jingwan tuid ki nongwan jngohkai pyrthei sha kane ka jylla, nangta ki nongwan seng kam bad ruh ka jingpynjan shuh shuh ïa kiwei ki bynta jong ka ri bad ka jylla.
Ka Sorkar Meghalaya ka buh ïa ki jingbei tyngka kiba heh ha ka kam jngohkai pyrthei, da ka jingkular ban theh palat 4,000 klur ban pynroi ïa ki jaka jngohkai pyrthei kiba thymmai bad ban pynkhlain ïa kiba la don lypa.
Ka Sorkar ka dang trei shitom ruh ban pynkhih ïa ki jingbei tyngka jong ki riew shimet, kynthup ïa ki jingthmu ban seng ïa ki jaka jngohkai pyrthei kiba heh ha Umïam, Shillong, bad New Shillong, ki ban pynbïang ïa ki jaka sah kai kiba paka bad ruh ban long kum ki lad aikam ai jam ïa ki samla ka jylla.
Ha u bnai Nohprah 2024, ka sorkar ka la buh ïa u maw nongrim na ka bynta ka Shillong Ropeway Project, ka ropeway ban kit nongleit nongwan ba nyngkong eh jong ka jylla.
Ka projek ropeway ryngkat bad kiwei ki projek ban khring nongjngohkai pyrthei ha Mawsynram, Mandalgre, Marngar, bad Wahkhen baroh ki long kiba la khreh ban ai kam ai jam ïa ki samla trai ri ha kylleng ki thaiñ bapher bapher jong ka Jylla.
Haba phai sha ki kalendar ban khring ïa ki nongjngohkai pyrthei, ka Meghalaya ka la ju pynlong ïa ki tamasa kiba heh kiba ïahap bad ka kolshor jong ka jylla kum ka tamasa Cherry Blossom, Me’gong Festival ha Tura, bad ka Winter Tales, kine kiba la ïoh ban khring ïa ki paidbah na kylleng ki bynta jong ka pyrthei bad ruh kaba long shi bynta ban kyntiew ïa ka sap jong ki briew na ka thain, nangta ka bam ka dih tynrai bad ruh ka jinglong tynrai jong ka jylla.
Kumta la ong ba ka jingpynheh shuh shuh ïa ka Shillong Airport kan nang ïarap shuh shuh ïa ka jingnang bun ki nongwan jngohkai sha kane ka jylla.