Ïamir jingmut ki Rangbah Shnong bad ki bor pynïaid ka Kompeni ba pyntrei ïa ka surok Nongstoiñ-Wahkaji

Nongstoiñ, Lber, 24: Ka jingpyntrei ïa ka surok Intermediate Lane na Nongstoiñ sha Wahkaji da kawei ka Kompeni shna surok kaba na ri Russia, ka la ïaid shait shait bad katei ka Kompeni kam shym la pyntrei hi hynrei ka la shu ai wai ha kiwei pat ki Kompeni.
Ka rukom ai wai ban pyntrei ïa katei ka surok ka long ba uwei u kontraktor u hap ban pyntrei tang san kilomitar bad ki tnad treikam kiba peit ïa ka jingpyntrei ïa katei ka surok ki dei ka PWD Nongstoiñ Division bad ka Mawkyrwat Division. Ka Nongstoiñ Division ka hap ban peit haduh u pud jong ka West Khasi Hills bad ka South West Khasi Hills ïa ki bynta kiba dei.
Lada don ki jaka kiba katei ka surok ka ïaid lyngba shuwa ban pyntrei, ki Kontraktor ki hap ban ïapynbeit bad ki trai khyndew ha ryngkat ka jingïadon lang jong ki nongtrei jong ka tnad PWD kaba dei khmih ïa katei ka bynta. Ha kaba ïadei bad ka bynta kaba hap ha ka jingpeit jong ka PWD Nongstoiñ Division, ka don ka bynta ba ka Kompeni kam pat sdang ban pyntrei, kata naduh shnong Kynroh haduh Nonglwai II.
Ka daw ka long ba ki nongshong shnong kiba don khyndew ha ki bynta ba katei ka surok ka dei ban ïaid lyngba, kim pat lah ban ïa pynbeit ha kano ka rukom yn pyntrei ïa katei ka surok. Kumta mynta ka sngi ki riew rangbah jong ka Nonglwai I bad Nonglwai II ha ryngkat u Sub Divisional Oficcer bad u Junior Engineer kiba dei peit ïa katei ka surok, ki la leit ban ïakynduh ïa ki nongpynïaid jong katei ka Kompeni bad ban pynsngewthuh ïa ki ba ha shuwa ba kin sdang ban pyntrei ïa katei ka surok, ki dei ban da buh dak ha ki bynta kiba markhap jong man la uwei pa uwei u trai jaka, khnang ba kan ym don kano kano ka jingwit ha ka por ba pyntrei.
Ha katei ka jingïakyn-duh ïa kitei ki heh ka Kompeni bad hadien ka jingïamir jingmut kaba bniah, ka jingïakren ka la long kaba seisoh ha kaba ki heh ka Kompeni, ki la mynjur ban leh ïa kaei ba ki heh ka PWD ki rangbah shnong bad ki trai khyndew ki kwah.
U bah George Kharbani sordar jong ka shnong Nonglwai II, u ba don ruh ïa ki jaka ha kaba katei ka surok ka dei ban ïaid, u la ong ba na ka liang jong u kum u rangbah shnong bad u trai jaka, u kwah ba ka jingpyntrei ïa katei ka surok ka long katkum ki jingthoh jingtar kiba la dep thew dep woh, ïa kiba la pynrung naduh ka por ba la sdang ban leh ïa ka sorbe.
Nalorkata u la kyntu ruh ïa ka Kompeni ba ka dei ban pynsted ïa ka jingtrei bad ban trei ruh katkum ki kyndon ba la bthah da ka sorkar, khnang ba kan ym don kano kano ka jingeh hadien habud.