Mawkyrwat, Jylliew, 15: Kum shibynta ban pynshlur bad ai mynsiem ïa ki samla pule jong ka shnong Kensimphlang, ka KSU Kensimphlang Unit ka la pynkupburom ïa ki samla kiba pas bha ha ki kyrdan pule bapher bapher da ka khusnam “2nd Mait Shaphrang Academic Award 2025”.
Ha ka jingïalang kaba la long hapoh ka shnong Kensimphlang, South West Khasi Hills District la sakhi lang da u Legal Affairs Secretary jong ka KSU Central Body u samla James Hitler Mawphniang kum u kongsan ha kaba u la kyntu ïa ki samla pule ba kin ïai long kiba minot bad trei shitom shuh ha ki jingpule jong ki, namar kane ka jingpynkupburom jong ka KSU ka dei tang ka jingaimynsiem kam pat dei ka jingkut jong ka jingjop jong ki.
U la ong ruh ba khamtam haba ki samla ki im ha kane ka juk jong ka jingïaleh ki dei ban long kiba kut jingmut khlem kynrandien. Hooid! ym lah khlem da pyrto ïa ki longshwa jong ngi kiba la len lade ban ïa leh bad ïada ïa ka jaidbynriew da u khnam ka ryntieh hynrei kane ka por kam dei shuh kumta, ngi hap ban ïa khun da u khulom ban pyntikna ïa ka jingkhlaiñ ka jaidbynriew ha ki liang baroh.
Ha kawei pat ka liang, Ka KSU naduh ka snem 1994 ka la sdang ban pynlong kum kine ki jait prokram ban pynshlur ïa ki samla ha ki jingpule jong ki bad haduh kine ki sngi ka KSU ka ju ai mynsiem bad ha i bor ba rit ka ju pynlong ïa ki entrance exam ban jied ïa ki samla ki ba tbit ban phah ïa ki ban leit ha ki coaching centre bapher bapher shabar ka jylla ban ïa khun ïa ki eksam Civil Services bad ban kyrshan ruh lyngba ka scholarship.
Ka Seng ka kitbok kitrwiang ïa kine ki samla ba kin nangtrei shitom shuh khnang ba kin kynjoh sa ka thong ha ka pule puthi. Namar la ju ong, “Ka pule puthi ka dei ka atiar ba nep tam kaba lada ngi la pyndonkam ïa ka ngi lah ban pynkylla ïa ka pyrthei”.
Ha kane ka sngi la ïa donlang u samla Shelkitbok Kharbani, Asst. Education Secretary KSU CEC kum u symbud kongsan, u Bah Dennis Nongsiej, DSEO ka South West Khasi Hills District kum u Symbud Kongsan, u samla Evanroy Nongrem, Education Secretary KSU South West Khasi Hills District, u samla Rutherford Lyngdoh, President KSU Mawkyrwat Circle, u Myntri jong ka Shnong Kensimphlang, kiwei pat ki nongïalam ka KSU South West Khasi Hills District, KSU Mawkyrwat Circle, ki khynnah skul, ki nonghikai bad ki kmie ki kpa.
