Shillong, ïaïong: U MLA ka Mawlai u Bah PT Sawkmie u la pynïoh ïa ka jingïarap kaba 11 lak tyngka na ka bynta ka jingshna ïa ki lynti dewbilat kiba lah ruh ban ïaid kali ha shnong Mawlai Umthlong.
Ki ar tylli ki lynti ïaid kjat, ba kynthup ïa kawei ha Dong Umshor Shor kaba la mang 1 lak tyngka bad kawei ha dong Soh Plom kaba la mang 5 lak tyngka na ka MLA skhim jong u, ki la plie ha ka sngi Saitjaiñ ba la lah ha ka jingdon ryngkat u rangbah shnong ka Mawlai Umthlong bah Tyllilang Mylliem Umlong, assistant rangbah shnong bad kiwei.
Sa kawei kaba la mang 5 lak tyngka na ka skhim jong u hi ha Soh plom yn sa plie hadien namar ki dang sah sa katto katne bynta ban pyndep. Ha kane ka juh ka sngi u MLA u la aiti ruh ïa ki tiar shet tiar tiew sha ki saw tylli ki dong kiba don ha Umthlong, ka Dwarbah, Soh Plum, Lummawnei bad Umshor Shor.
Halor ka lynti ha dong Soh Plom, i Kong Silvia Mylliem Umlong iwei na ki nongshong shnong ha Umthlong i la ai khublei bad pynpaw ïa ka jingsngew nguh ïa u MLA ba u la pynurlong ïa ka jingangnud ka jong i, kaba da ki phew snem kaba i la kwah ïa kane ka lynti bad khatduh hapoh ka jinglong MLA Bah PT Sawkmie ki la ïoh ban plie.
I la ïathuh,ruh ba hashuwa kane i la mad jingeh bha khamtam haba pang ba shitom namar kane ka lynti ka la long kaba khohruh khohram bad shem jingeh bha ban ïaid.
Nalor kata I la pynpaw ïa ka jingsngewkmen kaba shikatdei eh ba ka Mawlai ka la ïoh ïa u nongmihkhmat ba sngewthuh ïa ka eh ka shon ki paidbah ka thaiñ bad u ba kloi ban ai ïa ki lad jingïarap ha ki bynta bapher bapher.
Katba na ka liang u Bah PT Sawkmie uba la ai jingkren ha kane ka sngi u la pynpaw ka jingsngew kmen ka ba khraw ban ïoh ban mang 11 lak tyngka na ka bynta ka dorbar shnong Mawlai Umthlong na ka MLA skhim ban shna ïa kine ki lynti dewbilat.
Shuh shuh ha kane ka sngi la ïoh ruh ïa ka jingkren na u rangbah shnong u ba la pynpaw ïa ka jing sngewnguh ïa u MLA bad u la pynpaw ruh ba kane kam dei ka sien kaba nyngkong, hynrei kiba bun ki matti jong bah PT Sawkmie ki don hapoh shnong lyngba ka jingïarap jong u MLA.
