Shillong, Rymphang 27 : U Myntri ka Koit ka Khiah u Ma Wailadmiki Shylla ula pyntip ïa ka ïing Dorbar Thaw Aiñ ha ka Sngi Thohdieng, ba ka jingsiew ba palat 11.36 klur tyngka la siew hapoh ka Megha Health Insurance Scheme (MHIS) ban sumar dialysis ïa kiba pang khyllai.
U ïathuh ba ka Tnad ka pyrshang katba lah ban pynkhlaiñ ïa ka jingshakri, haba pynpaw ba ka jingsumar dialysis ruh lah dep kynthup lang hapoh ka MHIS.
Kane ka jubab kala mih hadien ba ka jingsngewkhia u Nongialam ka VPP Ardent Basaiawmoit, ba bun ki nongpang kiba wan na ki longïing ba duk, la pynbor ba kin leit sumar sha ki jaka sumar shimet namar ka jingduna ki tiar sumar ha ki hospital sorkar. Hynrei u Ma Wailad u la ong ba wat la ki leit sha ki hospital jong ki riew shimet ruh ki ioh ban sumar da ka skhim MHIS.
“Ngim lah ban khmih lynti ïa ki nongpang ba duk ba kin leit sumar ha ki hospital shimet” ong u bah Ardent haba kyntu ïa ka Sorkar ban buh ïa ki Nephrologist.
U Ma Wailad u pyntip ba ki District Hospital ka Sorkar ki shim 3000 tyngka man ba leh ïa ka dialysis, kaba ka jinglut lah pynhap hapoh ka MHIS bad ki hospital shimet ruh lah pynrung lang ha ka MHIS.
“Ki doktor medicine ki la khmih ïa kane ka jingsumar ha ka jaka ki nephrologist” ula ong haba bynrap ba tang uwei u nephrologist u don ha ka Jylla namar ka jingduna kiba aplai.
Haba u Nongïalam ka Liang Pyrshah Mukul Sangma ula ban jur ïa ka jingkdup ka MHIS ïa kiwei ki jingpang, u Ma Wailad ula pynpaw ba ka Sorkar kan sa wad ïa ki lad ki lynti ban lah pynlong ïa ki jingai jingsumar kiba lah ban siew. Halor ka jingslem, ula ong ba ka jingdon ki nongpang ka la kiew bha bad ka Tnad ka la pyrshang ban pynbun ïa ki machine bad ki technician.
Ka Jylla mynta ka don 54 tylli ki dialysis machine ha East Khasi Hills-12 tylli ha Shillong Civil Hospital (10 kiba treikam) bad 42 tylli ha ki hospital shimet.
U Ma Wailad ula pynbna ïa ka jingthmu ban pynbun ïa ki dialysis unit ha kiwei ruh ki district hospital bad suki suki wat sha ki CHC ruh.
