Jowai, Naitung, 08: Ki nongïalam ka Seiñ Raij Jowai kiba kynthup ïa u President Bah Hercules Toi ryngkat ka jingïadon lang u Doloi ka Elaka Jowai Bah Puramon Kynjing, u General Secretary Bah Awotki Sumer ha ka sngi Baar ki la pyntip ba ka jingpynkhreh ïa ka lehniam Behdienkhlam ‘saw sngi lai miet’ kan sdang naduh ka 11 tarik bad kan kut haduh ka 14 tarik, Naitung, 2025.
Ki nongpynïaid ka Sein Raij Jowai, ki la pynpaw ba kane ka lehñiam Behdienkhlam mynta u snem kan long kaba phuh ba phieng, ha kaba ki ar ngut ki Symbud Myntri Rangbah ka jylla, kata u Bah Sniawbhalang Dhar bad u Bah Prestone Tynsong ryngkat kiwei dei ki Myntri Sorkar, ki MLA, ki MDC kin don lang ha ka sngi pynkut.
U President ka Seiñ Raij Jowai kumjuh u Dolloi ki la pynpaw ka jingsngewkmen kaba khraw haba ki la ïoh biang ban rakhe ïa kane ka shad Behdienkhlam kumba ju long mala u snem.
Ki la khot bad wer lang ïa baroh ban ïawan sakhi lang sha kane ka lehñiam shad Behdienkhlam ka ban sa long ha nongbah Jowai.
Ka Seiñ Rai Jowai ka pyntip ruh ïa ka rukom ïaid bad ïeng ki kali kiba wan ban sakhi ïa ka lehniam Behdienkhlam kum ki No Entry, ki jaka buh ne pynïeng ïa ki kali Parking kiba la pynbeit da ka tnat Pulit ka Jowai.
