Nongpoh, Nailar 08: Kan long shisha ka jingmyntoi na ka bynta kito ki longïing Longsem kiba ym don ïing don sem kiba shong ba sah ha ki shnong ba hap ha ka sor Nongpoh, ha kaba lyngba ka skhim sorkar kmie ha ba la tip kum ka PMAY(U) kin don haduh 1091 tylli ki longïing ki ban ïoh ïa ka ïingsah kaba dei kaba la mang kyrpang da ka sorkar kmie lyngba ka Ministry of Housing & Urban Affairs ha ka jingpyntreikam ka sorkar jylla lyngba ka tnad Urban Affair.
Kum ban pynkynmaw, kane ka skhim Pradhan Mantri Awas Yojana (PMAY- Urban) ka dei ka skhim ba la wan rah kyrpang da ka sorkar kmie lyngba ka Ministry of Housing & Urban Affairs ban ïarap kyrpang na ka bynta kito ki nonghsong shnong ha ki jaka sor kiba ym don ïing don sem bad na ka bynta ka Nongpoh Town ka sorkar jylla ka la dep ban mang kyrpang haduh 1091 tylli ki longïing.
Haba ïa kren bad u Mawphor, u Secretary ka Nongpoh Town, u Bah Rayonald Kharkamni, u la ong ba tang na ka bynta kito ki longïing kiba ym don ïingsah hapoh ki shnong ba hap ha ka Nongpoh town ki la poi haduh 1091 tylli ki ïing ban sa shna na ka skhim PMAY(U) bad kane kan long shisha ka jingkyrkhu na ka bynta kito kiba ym don ïingsah hapoh kane ka sor Nongpoh.
U la ong ruh ba kane ka skhim PMAY (U) ha sor Nongpoh ka la urlong bad kito ki longing kin sa ioh jingmyntoi ruh ka dei na ka jingtrei shitom ka tnad urban Affair ka sorkar jylla, ha kaba katei ka skhim kaba wan na ka sorkar kmie la pyntreikam kyrpang ban ai ïing ïa kito kiba ym don ïing don sem kumba la buh thong da ka sorkar kmie lyngba ka Ministry of Housing & Urban Affair, ka sorkar pdeng.
“Ka Nongpoh Town Committee ka la long ruh kaba donbok ha kaba tang na ka bynta ka Nongpoh Town ka sorkar ka la mang haduh 1091 tylli ki ïing ban shna na kane ka skhim PMAY bad haduh mynta la lah ban pyndep haduh 500 tam ki ïing kiban aiti noh sha kito ki longïing kiba la mang lyngba aktei ka skhim” ong u Bah Rayonald Kharkamni.
Na ka liang ka Nongpoh Town Committee ka ai khublei kyrpang ruh ïa ka tnad Urban Affair ka sorkar jylla bad khamtam ïa ki ophisar ba kynthup ïa ka Kong W. Pasah bad u Bah J.R Rynjah, kiba dei ki ophis kiba la trei shitom bad dei lyngba ka jingtrei shitom jongki la lah ban pynurlong bad ban pyntreikam hok ïa kane ka skhim PMAY-U kaba ai jingmyntoi shisha na ka bynta kito ki longïing kiba ym don ïingsah hapoh ka Nongpoh Town, ong u Bah Kharkamni.
Shuh shuh, u la pyntip ruh ba ïa kane ka skhim la pyntreikam da ka tnad Urban Affair katkum ki kyndon (Phase Wise) naduh u snem 2018 ter ter haduh mynta u snem 202 bad kum ka Town Committee ka khmih lynti ruh ba kiwei ki ïing kiba ym pat lah ban pyndep ruh kin sa pyndep kham kloi da ka jingïatrei lang ka Town Committee, ki Dorbar Shnong bad ka tnad urban bad khamtam kito ki longïing kiba ioh ïa katei ka bhah kumba la mang da ka sorkar jylla bad ka sorkar kmie ba kane ka skhim ka la ai jingmyntoi shisha na ka bynta kito kiba ym don ïing don sem hapoh ka Nongpoh Town, u la bynrap.
