Da ki saw wiket pynliem ka All Jaiñtia ïa ka Ri Bhoi ha ka U-23 Women’s Cricket

Shillong, Lber 23: Ki thei ïalehkai kriket ka All Jaiñtia Cricket Association ki la ïoh ban pynliem da saw wiket ïa ka Ri Bhoi ha ka Meghalaya Cricket Association U-23 Women’s Inter District Cricket Tournament kaba long ha Nongstoiñ hynne ka sngi.
Haba kawang nyngkong, ki thei ka AJCA ki la ailad ïa ki thei ka Ri Bhoi ban ïoh kamai tang168 ron la 5 wiket ha ki 29 over. Hynrei haba la poi ka pali jong ki ban beh ïa ka thong ki la ïoh ban pyndep tang ha ki 26.2 over bad liem pat hynriew ngut ki nongtied ha ka jingïakhun na ka Group A, Zone 1.
Kitei baroh ar tylli ki kynhun kim shym la lah ban tehlakam ban shu ai kamai suk kaba pynlong ïa baroh arliang ban shu kiew tang ka ron khlem kamai. Tang ka AJCA ka la pynsepei 91 ron katba ka Ri Bhoi pat 63 ron.
Na ka liang ka Ri Bhoi, ka Banrisha Wahlang ka la dei tang ma ka ba ïoh kamai bun ron daki 28 ron, bud sa ka Angelica Maring da ki 19 ron khlem pat liem. Na ki nongkawang bol pat, ka Aidashisha Shadap bad ka Pyntha Lamurong ka la ïoh ban khur mar ar wiket na ka bynta ka AJCA.
Haba beh ïa ka thong, ka Kermina Challam kaba la ïoh ruh ban khur ïa ka khusnam player-of-the-match ka la ïoh ban khyrwit san tylli ki saw ron ha ki 40 ron, katba ka Mercia Able Dhar ka la ïoh kamai 17 ron, bud sa ka Ritreki Pohshna 14 ron bad ruh ka Phaintis Lyngdoh 14 ron. Na ki nongkawang bol ka Ri Bhoi ka Doilna Martin ka la ïoh ban khur ar wiket.
Ka jingïakhun la shai ka sngi ha ka Group B na ka Zone 1 kan long hapdeng ka South West Khasi Hills pyrshah ïa ka West Khasi Hills, katba ha ka jingïakhun ha ka Zone 2 kan long ha Nongalbibra, South Garo Hills ha kaba ka North Garo Hills kan ïakhun pyrshah ïa ka Tura District CA.