Shillong, Rymphang 15 : Ha ka 14/02/2026 u Ma Lahkmen Rymbui u MLA jong ka 7 Amlarem Constituency bad kumjuh ruh u Myntri ka tnad pule puthi jong ka sorkar jylla u la ïoh ban aiti ïa kawei ka kali sha ka Shnong Kyrweng kaba don ha khappud Bangladesh kaba la thied kyrpang khnang ban kit ïa ki samla pule UP School shaneng na Kyrweng sha Muktapur.
Ka jingai ïa kane ka kali ka long da ka jingthmu ba ka jingleit skul wan skul ki khynnah kan long kaba thikna bad ban lait na kino kino ki jingma jingmynsaw bad khamtam eh ba kin poi skul man la ka sngi.ïa Kane ka kali la mang na ka scheme SRWP 2025-2026 Kane ka jingthmu da ka jingmut ban pynsuk bad pynthikna ïa ki khynnah skul ba kin ïoh ïa ka jingpule kaba shngaiñ khamtam haba sniew ka mariang.
Haba kren ha katei ka jingïalang, u Myntri u la ong ba ka roi ka par ka urlong da ka jingïatreilang naduh ki shnong ki thaw bad iwei pa iwei. U la ong ruh ba ïa kane ka kali ka shnong kam pan na u hynrei kum u nongmihkhmat ynda u ïohi ïa ki jingdonkam ki khynnah skul khamtam ha ka por Lyiur ba ki khynnah ki shitom ban beh sha skul kumta u la rai ban mang pisa kyrpang ïa kane ka jingdonkam. U myntri u la kyntu ruh ïa ki nongshong shnong ba kim dei ban pyndonkam bakla ïa katei ka kali bad u la ban jur ba dei beit tang ïa ki khynnah skul lait tang haba donkam emergency. U la kyrpad ruh ïa ka Durbar Shnong ba kan shim ïa ka jingkitkhlieh kaba pura na ka bynta ban sumar ïa ka kali khnang ba kan long ka jingmyntoi ïa ki samla pule ha ki snem ban wan.
Ha kane ka prokram, u Myntri u la ïoh ban sam ïa ki work order sha ka Shnong Kyrweng kaba kot sha ka 5 lak tyngka na ka bynta ban pynheh shuh shuh ïa ki kamra klas na ka bynta ka Kyrweng LP skul. Kane ka sienjam la khmih lynti ba kan pynbha ïa ka jaka pule bad ban pyndap ïa ka jingbun ki khynnah skul kiba nangroi. Nalor kata, u la ïoh ruh ban ai ïa ka work order ba kot sha ka 1 lak tyngka na ka bynta ban shna ïa ka paiñkhana skul,kaba pynskhem ïa ka jingdonkam jong ka jingkhuid jingsuba bad ka koit ka khiah jong ki paidbah.
Bad u la ai ruh ïa ka jingkyrshan pynroi ïa ka shnong Sankhat da kaba aiti ïa ki work order kaba 5 lak tyngka na ka bynta ban shna surok shnong bad 2 lak tyngka na ka bynta ka Balang Katholik ban shna kynroh.
Bad ha kajuh ka sngi u MLA u la aiti ruh ïa kawei ka kali ban kit ñuit sha ka Shnong Khonglah na ka bynta ban kyrshan ïa ka khuid ka suba ka shnong. u MLA u la pynpaw ba ka jingkhuid jingsuba ka long kaba kongsan bha na ka bynta ka Koit ka khiah ban kiew ha ka roi ka par. U la pynpaw ka jingkyrmen ba kane ka jingthmu kan wanrah ïa ka jingsngewthuh bad wanrah ïa ka jingkylla kaba bha, kaba ai mynsiem ïa ka imlang sahlang ban pynneh pynsah ïa ka mariang kaba khuid bad kaba koit ba khiah na ka bynta ki pateng ban wan.