Shillong, Ïaiong 18 : Kin don haduh 1010 tylli ki longïing kiban myntoi na ka projek umbam umdih ba 8.60 klur tyngka lyngba ka skim Jal Jeevan Mission ha ka shnong Mawlynrei.
Ïa katei ka projek ban pynpoi umbam umdih sha kitei ki longïing la wan ban buh mawnongrim da u Symbud Myntri Rangbah ka jylla, Bah Prestone Tynsong ryngkat ka jingdonlang u Myntri ka tnad PHE, Bah Renikton L Tongkhar kumjuh u MLA ka thaiñ Bah Pynïaid Syiem.
Lyngba katei ka skim, kin don haduh kumba 7474 ngut ki nongshong shnong jong katei ka thaiñ kiban ïoh jingmyntoi.
Haba kren ha kane ka sngi, u Symbud Myntri Rangbah u la ong ba ki don palat 7 lak tylli ki longïing kiba la lah ban pynpoi um lyngba ka JJM. Kumta, u la kyntu ïa ki nongshong shnong ba kin ai ka jingïatrei lang bad ki bor shnong kumjuh ki engineer ba kin lah ban pynstet ïa ka kam khamtam haba donkam ban pynpoi ïa ki pipe um ha ki khyrdop ïing jong ki.
Na ka liang u symbud myntri rangbah ka jylla, u la ai khublei kyrpang ïa ka longïing jong i kong Rilod Kharkongor bad ka longïing jong I (L) kong Dlit Marboh kiba la ai sngewbha ïa ka jaka jong ki ban ïoh ban pynieng ïa ki topum bad ban pynïaid ïa ki pipe.
