100 klur tyngka dawa bai mynraiñ khmat u Dy CM na u Ma Pala ba kynnoh khlem nongrim bad pynjah burom

Shillong, Nailur 4 : U Symbud Myntri Rangbah ka jylla uba dei peit ïa ka tnad Commerce and Industries, Urban Affairs, Transport bad kiwei kiwei u Ma Sniawbhalang Dhar mynta ka Sngi Balang u la khyrwit da ka legal notice ïa u President ka Congress uba dei u MP ba rim ka jylla u ma Vincent H Pala ha kaba u la dawa ym tang ban pan map paidbah halor ki jingkynnoh ba khlem nongrim bad ba shu pynjah burom ïa u hynrei u dawa ruh ka bai mynraiñ khmat haduh 100 klur tyngka na u ma Pala.
Kane ka Legal Notice pyrshah ïa u ma Pala ka long halor ka jingkynnoh jong u ïa u ma Sniawbhalang Dhar ba u dei u nongpathai khubor ka Bharatiya Janata Party (BJP), Rashtriya Swayamsevak Sang (RSS). “ Lada ki kren ïa kano kano kata naduh ka Congress -mukt Bharat ne India-mukt Bharat u ma Sniawbhalang u dei u nongpathai khubor jongki namar ki tip ïa ki kam beaiñ jongu bad ki paralok jongu naduh ki kam khaïi drok, dewiong ne kiwei kiwei. Ha ka por ba nga dang long MP ki CBI ki ju wan kylli na nga ban tip ei ei shaphang jongu ma Sniawbha. Baroh ki file ki don ha ka miej jong ka CBI. Ka histori kan sa ïathuh ïa phi uei u Pala bad uei u Sniawbhalang. Phi la ïohi kiba bun ki briew ki la rung phatok kum u Kejriwal la u dei u Myntri Rangbah, ne uno uno la u dei u Myntri Rangbah ba mynshwa ruh, ne ki myntri sorkar ruh ynda ki la sei madan ïa ki jingthoh jongki kin sa ngat ha ka jingeh na kata ka daw u hap ban kren na ka bynta ka BJP lym kumta ka BJP kan pynkut syndon noh ïa u. Kumta ka sur kren jong u Sniawbhalang Dhar ka long beit shispah na ka shispah na ka bynta ka BJP bad RSS kumta ki briew ka Meghalaya ki dei ban tip u dei uei namar u sheptieng ba ka CBI ka la peit kliaw bha ïa u ”.
Kat kum ka legal notice ba la phah da ka Sharan and Associates LLP Advocates and Solicitors, ka pynpaw ba “ U nongujor jongngi u ma Sniawbhalang Dhar u pdiang ïa kino kino ki jingkynthoh kiba tei bad don jingmut hynrei ban shu kynnoh pathar ïa kiba khlem nongrim bad kiba ym don jingshisha ka dei beit tang ka jingthmu ban pynjah burom ïa u hakhmat ki paidbah. Kane ka jingkren pathar ha ka jingïakren bad ki nongthoh khubor ka dei kaba la saiñdur bha ban pynjah burom ïa u ma Sniawbhalang hakhmat ki briew tang namar ba u ma Pala u kwah ban myntoi shimet”
“ Kumta ngi thoh hangne ban dawa na phi (a) bab ai da ka jingthoh ban weng ïa ki jingkynnoh bad ban pan map bad phah sha ngi ba ngin bishar la ngi pdiang bad mynjur ne em ïa kita ki jingpan map jongphi bad hadien kane ïa kane ka jingpanmap phi dei ban pynmih ha baroh ki kot khubor bad channel. (b) ban ai da ka jingthoh ba nangne shakhmat phin ym mlien shuh ban dang ïai kynnoh biang kumne ïa u briew jong ngi u ma Sniawbhalang. (c) ban siew ïa ka bai mynraiñ khmat kaba 100 klur tyngka namar ba phi la pynjah burom shaba palat pud ïa u briew jong ngi u ma Sniawbhalang bad phi dei ban siew ïa kane ka bai mynraiñ khmat namar phi la pynjah burom ïa u hakhmat ka imlang ka sahlang bad hakhmat ki briew”.
“ Nalor kane la bthah ruh ïa phi ba phi dei ban weng lut na baroh ki jingthoh bad jingpyni dur kiba phi la kren ha ka jingïakynduh bad ki nongthoh khubor bad ban pan map ruh na u briew jong ngi bad pynshai ruh ba ki jingkynnoh ki long ki bym shisha bad ki bym don nongrim. Phi dei ban phah ïa kine ki jingpanmap jongphi hapoh 7 sngi naduh ka sngi ba phi ïoh pdiang ïa kane ka legal notice bad phi lah ban jubab na ka WhatsApp/e-mail, speed post lane da kano kano ka lad kaba kloi tam. Nalor kata phi dei ban phah weng lut na baroh ki social media bad website ïa katei ka press conference kaba la dep pynmih online. Nalor kane phim lah shuh ban kren kino kino ki jingkren pyrshah ïa u briew jong ngi ( u ma Sniawbhalang Dhar nangne shakhmat halor kino kino kiba ktah ïa u hakhmat ka imlang ka sahlang”.
“La maham ba lada phim leh ïa kiei kiba la bthah ne pyndep ïa kiei kiei kiba la bthah ïa phi kat kum ba la ai por hapoh hynniew sngi yn shim khia bha ïa kane ka kam bad u briew jong ngi u ma Sniawbhalang Dhar um banse ban leit ujor noh sha ka ïing bishar kynthup ïa katei ka jingpynjah burom ïa u kaba kynthup ïa ka defamation suit bad criminal complaint kat kum ki kyndon 351, 356 jongka Bharatiya Nyaya Sanhita (BNS) 2023. ïa ki jinglut jingsep ha ka jingïaleh ïa ka mukotduma ruh phin hap ban siew lut ma phi nadong shadong”.