Mawkyrwat, Ïaïong 04: Ka Seng Khasi Shnong Nonglang, South West Khasi Hills District, kan pynlong ïa ka Shad Suk Mynsiem ha ka 10 tarik u Ïaïong, 2022, ha ka por 3 baje nohphai sngi ha madan Shad Seng Khasi Nonglang, South West Khasi Hills District.
Kane ka shad ka kmen ka long ka jingkynmaw bad jingainguh U Khun-Khasi Khara shi-sien shi-snem ïa U Blei U Trai Kynrad u Nongthaw U Nongbuh na jrong na tbian ban neh la ka hok la ka riti.
Kumta, na ka liang ka Seng Khasi Nonglang ka khot bad khmih lynti ïa ki para khun ka Ri ban ïa poi lang ha kane ka shad ka kmen bad ban ïa mih nongshad kynthei bad shynrang bad la ka riam ka beit pura ban phuh ban phieng la ka kam ban sah pyrto donburom la ka Ri.
Shuh shuh, na ka liang ka Seng ka pyntip ruh ba ha kajuh hi ka sngi ha ka por 8:30 janmiet kan don ruh ka jingïakop shad hapoh ka Hall jong ka Seng Khasi Nonglang bad kan don ruh ka khusnam na ka bynta kiba jop. Ka bai rung ki nongshad ka dei T. 350/- marwei bad nongpeit kai T. 50/- marwei.
Na ka bynta ki nongshad, la bthah ba ym shah ban wan shad ‘remix’, ym shah ïa kiba la rung ha ka Meghalaya Got Talent bad yn shah ïa baroh ki jingrwai la ka long phareng, hindi bad kiwei kiwei.
