10 sngi ai por ki samla pule NEHU ban bishar thymmai ïa ka Grading System
![](https://mawphor.com/wp-content/uploads/2022/05/mawphor-1.jpg)
Shillong, Nailur, 06: Ka North Eastern Hills University Students Union (NEHUSU) ka la aipor tang shiphew sngi ïa ki bor pynïaid jong ka skulbah NEHU ba kin bishar thymmai noh ïa ka Grading System ba la pyntreikam hapoh kane ka skulbah.
Ka NEHUSU ka la byrngem ruh ban bteng biang ïa ki jingïakhih kiba tyngeh lada ki bor pynïaid jong kane ka skulbah kim sngap ïa kane ka jingdawa.
Da ki phew spah ngut ki samla pule jong kane ka skulbah ki la ïashim bynta ha ka jingïaid proseshon na khmat ka Central Library bad pynkut hakhmat ka ophis treikam u Vice Chancellor ka NEHU u Prof. PS Shukla ban pynsngew ïa kane ka jingdawa.
Ki samla pule ki la dawa ïa ki bor pynïaid ka NEHU ban shong bishar thymmai ïa ka Grading System namar la shem ba kane ka Grading System ba ai da kane ka skul bah ka dei kaba rit tam haba ïanujor bad kiwei ki skulbah kiba don ha ka Ri.
Ki la ong, “ka jingïoh Grade jong ki samla ka kot tang 65-68 % watla ki leh bha katno katno ruh bad kane ka la pynduhnong haduh katta katta ïa ki samla pule ba kin dang bteng biang ïa ki jingpule ha ki kyrdan Master ne ban ïoh Scholarship.”
Ha kane ka sngi, ki samla Pule ki la dawa ban pynsangeh shwa ïa ka result jong ka 2nd Semester kat bym pat pyntreikam ïa ka Grading System bad ban bishar bniah biang ïa ka result jong ki Semesters katkum ka Grading System.
Ki samla pule ki la dawa ïa u Vice Chancellor ba u dei ban hiar shuki namar ka jingmynthi ïa ki jingdawa.