10 snem ha along ryngkat bad ka kuna ngat u runar ba leh beijot ïa kawei ka khynnah

Nongstoiñ, Rymphang 03: U Superintendent of Police West Khasi Hills District Bah H. Kharkongor MPS, u la pyntip ba ha ka 9 tarik u Naiwieng 2019, la ïohpdiang ïa ka FIR na kawei ka nongujor kaba pyntip ba ka khun kynthei ba dang 15 snem ka rta jong ka la shah leh beijot ha u Rakesh Sohbar.
Katkum ka jingujor, la register ïa ka case pyrshah ïa u nongshah kynnoh ha Shallang Police Station Case No.15 (11)2019 hapoh ki Section 5(j)(ii) /6 jong ka POCSO Act. La shimti ïa ka jingtohkit hapoh ka jingtohkit ka WPSI Nylla Eulalia Wanniang jong ka Shallang Police Station bad hadien ba la pyndep ïa ka jingtohkit, la pynngat hapoh ki Section 5(j)(ii)/6 jong ka POCSO Act.
Hadien kata, ha ka 3 tarik u Nohprah, 2025, ka ïingkashari jong u Special Judge (POCSO) Nongstoiñ, hadien ba la bishar bniah ïa baroh ki sakhi bad ki sabut ba la wanrah ha ka por jingtohkit, ka la pynrem ïa u nongshah kynnoh u Rakesh Sohbar.
Ka ïingbishar ka la pynshitom ïa u ban shah set along haduh 10 snem (Rigorous Imprisonment) ryngkat bad ka kuna ba ?50,000/- na ka bynta ka kam bymman kaba hap hapoh Section 6 jong ka POCSO Act.
Lada um siew ïa ka kuna, u nongshah pynrem un hap ban shah set shuh shuh ha ka jingshah set suk (Simple Imprisonment) na ka bynta hynriew bnai namar ka kam bymman pyrshah ïa katei ka khynnah kynthei.