Jowai, Nailar, 19: Ka Jaiñtia Fishing & Environment Protection Association ha ka sngi Baar ka la synñiang da ka song pisa kaba T. 10,000/- hajar tyngka ha u ma Khroo L Pariat uba dei u President ka ‘Khooid Ya Ka Wah Myntdu’ ban ïakhun ïa ka mukotduma ha NGT Principal Bench New Delhi ka ban long ha ka 22 tarik u Nailar na ka bynta ka Wah Myntdu kaba dei ka nongbsa umbam.
La ïathuh ba kane ka jingïakhun mukotduma ka long na ka bynta ka hok jong ka Syiem Myntdu kaba ker tawiar ïa ka sor Jowai, namar kumba long mynta ka jingshah pynjot jong ka Wah Myntdu ka la jur bha naduh ka jingbret pathar ïa ki ñuit ki ner bad ka jingthew khyndew sha ki bynta ka wah na ka jingpyntrei surok bad kumjuh ka jingshah ktah jong ki pynthor kba ha shi lynter ka Wah Myntdu.
Kiwei de ki Dorbar Shnong bapher bapaher hapoh ka sor Jowai, kumjuh ki kynhun seng bad ki riew shimet ki la synñiang pisa ïa ka ‘Khooid Ya Ka Wah Myntdu’ ban ïakhun mukotduma na ka bynta ka hok jong ka Wah Myntdu.
