Shillong, Nailur, 13: Palat 10,000 ngut ki samla trai jylla ha ka jylla Meghalaya ki ladep ban rejistar na ka bynta ki 300 tylli ki kam kiba lait ha ka tnat shipai Border Security Force (BSF), kaba la pynlong ïa ka tnat ban pynjlan ïa ka jingthep kam kaba dang ïaid shakhmat ha ka jylla baroh kawei haduh ka 18 tarik mynta u bnai, la pyntip ka tnat shipai BSF.
Ha u kyrwoh ba la phah da u nongatktien ka tnat shipai BSF sha ki lad pathai khubor ha ka sngi Saitjaiñ, la pyntip ba ka jingpoi bun ki nongthep kam ka pyni ïa ka jingangnud jong ki samla shynrang bad kynthei na kylleng ka jylla, kiba bun na ki, ki la wan na ki shnong kiba jngai ban ïashim bynta ha ka jingthep kam.
Kane ka jingpynrungkam, la pynlong da ka Meghalaya Frontier Headquarters ha BSF Campus, 200 Bn Dhanakgiri, Tura bad ha SHQ BSF Mawpat Campus, Shillong.
Ka jingpynrungkam ka la sakhi ïa ka jingïashim bynta 70 persen na ki shynrang bad 30 persen na ki kynthei, kaba pynpaw ïa ka jingangnud jong ki samla ban rung sha ka kam shipai ïada khappud, u la ong.
“Da kane ka jingpynjlan, ka tnat shipai BSF ka la kut jingmut ban pynkupbor ïa ki samla trai jylla bad ban tei ïa ka bor kaba khlaiñ bad kaba aiti lut,” la bynrap u nongaiktien.
