Shillong, Nailur, 08: Ka Sorkar Jylla ha ka sngi Palei ka la aiti ïa ka Letter of Allotment (LoA) sha ka tnat Pulit Central Police Reserve Force ban aiti ïa ka jaka kaba 10 akar ha ka shnong shnong Mawdiangdiang, New Shillong Township na ka bynta ban shna ïa ka ktem sah bapura.
U Myntri Rangbah ka Jylla u Conrad Kongkal Sangma ha u kyrwoh ba la pyllait sha ki lad pathai khubor hadien ka jingïalang bad ki Heh Ophisar ka tnat Pulit CRPF u la ong, ba ki Pulit CRPF la bun bun snem ki la kyrpad ïa ka Sorkar Meghalaya ban ai jaka na ka bynta ban shna ïa ka ktem sah bapura.
U la ong, namarba ka Sorkar kam pat lah ban pynïoh ïa ka, ïa ki Battalion bad ki Company jong ka tnat Pulit CRPF la shu buh lynnong ha ki ktem sah ba shipor ha ki bynta bapher bapher jong ka nongbah Shillong bad ha ka jylla baroh kawei..
“Mynta ka sngi, ngi la shim ïa ka rai ban aiti ïa ka jaka kaba 10 akar ha New Shillong Township kaba don hajan ka IIM na ka bynta ki Pulit CRPF ba kin shna ïa ka jaka sah kaba pura ha kane ka jylla Meghalaya bad hadien kane yn sa pynkynriah noh ïa ki na ki ktem sah bashipor sha Mawdiangdiang,” u la ong.
“Ngi la ïathir sani ha kaba ïadei bad ka jingpynkynriah ïa ka ktem sah ha ki katto katne ki jaka hadien ba ka la mih ka jingdawa na ki paidbah, kum na ki jaka jong ka thaiñ Mawlai,” ong u Myntri Rangbah.
U Myntri Rangbah u la ong ba ka jingpynkynriah ïa ki ktem jong ki Pulit CRPF sha Mawdiangdiang kan sa urlong tang shu ïoh ïa ka jingmynjur na ka Ministry of Home Affairs, ka Sorkar India, ka ban sa shimti ïa ka jaka ba la aiti da ka Sorkar Jylla.
U la ong ruh ba ynda ki Pulit CRPF ki la kynriah na ka ktem sah kaba don ha Mawlai Nongkwar ïa kane ka jaka ka Sorkar kan sa pynkylla noh kum ka Skill and Entrepreneurship Training Centre.
“Ka jingïalang ka la long kaba seisoh bad ngi kyrmen ba shen ka Ministry of Home Affairs kan sa ai jingmynjur noh kham kloi ban shimti ïa ka jaka ïa kaba ngi la aiti sha ka tnat CRPF mynta ka sngi,” ong u Myntri Rangbah.
