10.68 klur ïoh lum khajna ka KHADC tang na ka Professional Tax

Shillong, Nohprah 19 : Ka Khasi Hills Autonomous District Council (KHADC) ka la ïoh lum haduh 10.68 klur tyngka (10,68,59,351 tyngka), ka khajna tang na ka Professional Tax tang mynta ka snem, kata tad haduh u Naiwieng 2024.
Ïa kane la jubab da u Executive Member ka tnad Taxation, Bah Fantin Joseph Lakadong ha ka Dorbar Tlang kaba sdang ha kane ka sngi Palei.
U EM haba jubab halor ka jingkylli ba wanrah da u Nongïalam ka Liang Pyrshah, Bah Titos W Chyne u la ong, “Ha ka jingïohi jongnga kum u EM ka tnad Trade, naduh ba sdang siew online ïa ki khajna ka jinglum khajna ka la poi 7.23 klur tyngka naduh u Ïaiong 2024 – Naiwieng 2024. Lada nujor pat bad ka jinglum khajna ha u snem 2023-24 kata naduh u Ïaiong 2023 – Naiwieng 2024 la ïoh lum 7.19 klur tyngka.”
Kumta, u ong ba ki sakhi ba naduh ba la sdang ban ailad ïa ki paidbah ba kin siew online ïa kine ki khajna, ka la don ka jingkiew ha ka jingïoh lum ïa ka Professional Tax.
Haba pynshai pat halor ka jingdon kiba ud ba hap ban leit na ki cyber cafe ban leit leh ïa kine ki jingsiew online, u EM u la ong ba u kubur ba kadei ka jingshisha ba ki paidbah ki ud ha kaba sdang hynrei mynta ka kam ka la ïaid shakhmat.
Da kaba ai khublei ïa katei ka sienjam ba ka EC ka plie lad ban siew online ïa kane ka khajna, na ka liang u Nongïalam ka Liang Pyrshah u kyntu ruh ïa u Executive Member ba ki dei ruh ban ailad ïa ki paidbah lada don kiba kwah ban wan siew ha ophis.