Nongpoh, Nailur 28: Ka Dorbar Shnong Pahamsyiem, Nongpoh kala rai ban pynlong ïaka jingpynkhuid shnong ba shisien shisnem, kum shibynta ban wanrah ïaka khuid ka suba jong ka shnong bad ki sawdong sawkun jong ka shnong ryngkat ka mariang kaba itynnad ban lait naki jingpang jingshitom.
Ïa katei ka jingpynkhuid shnong la rai ban pynlong haka 1 tarik Risaw naduh ka por 7:30 baje mynstep ryngkat ki riat ki tar naduh ki mohkhiew, ki wait, ki synsar bad kiwei kiwei ki tiar pynkhuid.
Naka liang ka Dorbar Shnong kala phah ruh ka kyrwoh sha baroh kiba don jaka ha katei ka shnong ba kin wan mih bad ai kyrteng ha katei ka sngi khnang ba katei ka jingpynkhuid shnong kan long kaba ïaid beit ïaid ryntih bad kino kino ki bym wan mih kin ngat ha ka kuna.
