Shillong, Naiwieng 12 : Ki samla pule ka skulbah NEHU kila ban jur ba kin nym pynjynsur satia ïa ki mat jingdawa jong ki ba kynthup ïa ka jingdawa ba u Vice Chancellor (VC) Prof PS Shukla un hiar shuki mardor.
Ka jingshong shah thngan ki samla pule ka skulbah NEHU kala dap shitaiew mynta ka sngi bad 12 ngut ki samla pule ki la poi sha hospital hadien ba ki la sdang tlot bor met.
“Na ki 12 ngut ki samla pule kiba la shah pynkit sha Hospital, 2 ngut ki dang don hapoh ka jingpeitngor jong ki doktor ha Hospital” la ong uwei na ki samla pule uba dang shu wanphai na Hospital.
Hadien ka jingwan phai na Hospital, baroh 10 ngut kila wan biang sha ka jaka shah thngan ha phyllaw ka Administrative Block ban bteng iaka jingïakhih jong ki lem bad kiwei ki para samla pule.
Haduh mynta ka jingshah thngan khlem pud sngi bad ka jingkhang khyrdep ïaka skulbah NEHU ka dang ïai bteng, kaba la pynlong ïa ki klass ban sangeh noh ha kane ka skulbah.
Haba kren sha ki lad pathai khubor, u President ka KSU NEHU u samla Sandy Sohtun u la ong ba baroh ki samla pule ka NEHU bad ki samla pule na ki jaka pule bapher bapher na Meghalaya bad shabar ka Jylla, ki la ai ka jingkyrshan ïa ka jingïakhih kaba dang ïaid ha NEHU.
“Wat hadien shitaiew ka jingshah thngan, ngi dang ïeng skhem beit ha ka jingdawa jong ngi ba u Vice Chancellor (VC) u dei ban hiar shuki noh bad dei ruh ban wengkam ïa u Registrar bad u Deputy Registrar” la ong u samla Sandy.
U samla Sandy u la pyntip ba ka NEHUTA bad ka MeTTA lem bad ka NEHUSU kila thoh daka shithi shaka President ka ri India bad sha u Myntri ka Sorkar Pdeng ba dei peit ïa ka tnad pule puthi ha ka 11 tarik Nailur, ban phah tuklar halor ka jingeh kaba dang ïaid mynta ha NEHU.
U la pyntip ruh baka NEHUTA bad ka MeTTA kila kynduh ïa u Lat ka jylla u CH Vijayashankar ha ka 12 tarik Naiwieng.
“Watla ngim shym la ïoh kano kano ka jingkhot kaba pura na u Lat hynrei ngi khmih lynti ba shen, u Lat un khot ïa ngi ban ïakren halor ka kynrum kynram kaba dang ïai bteng mynta ha NEHU” u la bynrap.
