1 taïew ai por ka HYC ïa NTC bad Dorbar Shnong ban pynkhuid ïa ka jaboh jabaiñ na sor Nongpoh

Nongpoh, Jylliew 04: Ka HYC Nongpoh Circle dang shen kala pynpaw ka jingsngewkhia kaba jur halor ka jingsatah ki jaboh jabaiñ ha sor Nongpoh bad haki jaka bret ñiut khlem don ba patiaw ban leit pynkhuid ïaki jaboh jabaiñ kaba la wanrah ruh ka jingsma iwtung kaba lah ruh ban ktah ïaka koit ka khiah jong ki paidbah.
Naka liang ki nongïalam ka HYC Nongpoh Circle hapoh ka jingïalam jong u Bah Richard Diengdoh President bad u Bah Tony Shylla Secretary kila leit ruh ban jurip mynta ka sngi ïa bun ki jaka ha sor Nongpoh namar ka jingsngewkhia halor ka jingbym don ka jingkitkhlieh ki bor ba dei peit ka Nongpoh Town Committee bad kumjuh ruh ka Dorbar Shnong Nongpoh ban lum bad pynkhuid ïaki jakhlia kiba la shu wan bret haki jaka theh ñiut bala buh ha bun ki bynta jong ka sor Nongpoh bad bala shu pynlang shi jaka.
Katei ka jingpynlang ïaki jaboh jabaiñ khlem don ba lum lane khat kala wanrah ruh ka jingijli ïaka sor Nongpoh bala dap satang da ki jaboh bad ka jingsma iwtung ba shyrkhei kaba mih na kitei ki jaka bret ñiut.
Haba kren sha ki lad pathai khubor naka liang ki nongïalam ka HYC ba kynthup ïa u Bah Richard Dieng bad u Tony Shylla kila pynpaw ka jingsngewkhia ban iohi ba ka sor Nongpoh ka dap bad satah satang da ki jaboh jabaiñ bad ym don ba shimkhia wat naka liang ka Nongpoh Town Committee bad ka Dorbar Shnong Nongpoh Proper bala pynlong ïaki paidbah ban shu bret bad kyntong ïaki ñiut.
Naka liang ka seng kila ai por ruh 1 taiew ïaka NTC bad kumjuh ruh ka Dorbar Shnong Nongpoh ban lum lane ban khat ïaki ñiut naka bynta ban wanrah ka khuid ka suba bad lait ruh naki jingpang jingshitom bad lada ym don ba patiaw naka liang ka seng kan sa shim da kiwei pat ki sienjam kiba kham tyngeh.