Shillong, Rymphang, 02: U samla Kitkupar Nongsiej na ka shnong Kynshi u la ïohrah ïa ka nam lahduh ha ka jingïakob rwai Sur Kynud Season-3 ba la pynlong da ka Don Bosco Media Network & TV. Da kane ka jingjop une u samla lud u la ïoh khur ïa ka khusnam da ka song pisa kaba T. 1 lak.
Ki don hynñiew ngut ki samla bad ki heprit kiba la poi sha ka jingïakhun phainal ha kane ka rynsan ïakob rwai. Ki nongrwai kiba la ïoh rung ha ka Grand Finale ki long ka Baphi Lyngdoh, Baphinrihun Mukhim, Rishannylla Hujoon, Reizel Dohling, Gwyneth Mawthoh bad Nestle R Syiemlieh. Kine ki la ïoh ïa ki syrnot bad ki momento ban pynsah kynmaw ha ka jingshim bynta jong ki.
Ha kane ka sngi la sakhi lang da ka Deputy Commissioner jong ka East Khasi Hills ka Kong RM Kurbah, ka Editor jong ka The Shillong Times, u Rev. Fr. Ritonbor Kharkongor, kiwei pat ki Phadar, ki kmie ki kpa jong ki nongïashim bynta.
Ha ka jingkren lyngkot ka Kong R M Kurbah ka la kyntu ïa ki samla ban tur da ka jingshlur ban ïashim bynta ha kum kine ki lad ki lynti ba ki Phadar ka jingïasyllok Salesian ki plie lad ban pynroi bad ban kyntiew ïa ki sap ki phong jong ki.
Ka la kdew ruh, da kaba ong, ban lait na ki jingriam kiba sniew kiba paw ha ki dur babun jait, tur shaphrang ban ïashim bynta ha kum kine ki jingpynroi ïa la ki sap ki phong. Ka la ïaroh ïa ka jingtrei shitom bad jingaiti met bad mynsiem jong ki Phadar Salesian na ka bynta ban pynroi, ban kyntiew bad ban pynjanai ïa ki sap jong ki samla ha kane ka juk.
Ka Kong Patricia ruh ka la pynshlur ïa ki samla bad ïa ki kmie ki kpa ban ïai pynshlur ïa ki khun ha kum kine ki lympung pyni pyrthei ïa la ki sap ki phong. U Vice-Provincial Rev. Fr. Jeevan Lakra ha ka jingkren lyngkot u la pynkynmaw ïa ka jingieid bakyrpang jong u Don Bosco Bakhuid, u nongsdang ïa ka Jingïasyllok ki Phadr Salesian ïa ki samla. Dei une u Riewkhuid uba la maitphang ban ai ki jinghikai bapura na ka bynta ki samla, kiba long ka lawei jong ki ri ka pyrthei. Ki matti jong u Don Bosco Bakhuid ki la phriang sha kylleng ki ri ka pyrthei da kawei ka sur, ban kyntiew ïa ki samla na ka bynta ka lawei baphyrnai.
Ha kane ka janmiet, ka Don Bosco Media Network & TV ka la ai khusnam “Rangkynsai Ki Samla” ïa u samla Mario Pathaw uba la don bynta ban noh synñiang sha u sup u thiar jong ka imlang ka sahlang ha kane ka jylla katba u Rev Fr. Babu Stephen u la ïoh ïa ka Cilia Memorial Award ba la pynsah nam ïa u Phadar Joseph Cilia u nongsdang ïa ka Don Bosco Youth Centre ha Laitumkhrah.
U Director jong ka DBMN&TV Rev Fr. Michael Makri u la ai ka jingkhublei ïa baroh kiba la donkti ban pynlong ïa ka Sur Kynud Season-3 kaba jop bad kaba kmen ha kane ka janmiet.
