Jowai, Naitung 27: U MLA ka 2 Jowai Constituency ma Wailadmiki Shylla hynnin ka sngi 26 tarik ula aiti ïa ka pisa kaba shi lak tyngka sha ka Jaiñtia Career Coaching Centre (JCCC) Jowai, kum shi bynta ban ïarap ïa ki khun samla ka Ri Jaiñtia hi baroh kawei bad ban ai mynsiem ba kin pynkhreh ïalade na ka bynta ki exam kam bapher bapher kum ka UPSC, MPSC, DSC, SSC, Banking bad kiwei kiwei de.
Ha ka jingïalang ba lyngkot u ma Wailad haba ai jingkren kum u kongsan ula ai mynsiem ïa ki khynnah samla ba kim dei ban duh mynsiem ha ka jingpynkhreh jong ki. U la bynrap ruh ba kidei ban trei shitom bad ban kut jingmut skhem ban poi sha ka thong ha ka jingïaleh jong ki ha kitei ki exam bapher bapher.
Shuh shuh ula kyntu ba ki samla ka thaiñ Jaiñtia kidei ruh ban phai khmat sha ka seng kam lajong bad ban ïeng ha la ki kjat (Entrepreneurship) ym tang ban shu khmih lynti than tang ïa ka kam sorkar.
Khatduh khatwai u la ai ruh ka jingkyrkhu kyrdoh ba ka centre kawei na ki jaka ai jinghikai ïa ki samla ba kan nang kiew irat ha ki kam kat kum ka jingthmu jong ka.
