Nongstoiñ, Lber, 25: Ka jingleh thurmur ka ophis bording jingshai ka MePDCL Nongstoiñ ka la pynklumar thlim ïa ki paidbah ka thaiñ Nongstoiñ bad ka West Khasi Hills District hi baroh kawei namar ka jingai bill pathar katei ka ophis sha ki longïing bapher bapher.
Katkum ka jingïathuh ki paidbah la ong ba ki bill kiba la poi ki don kiba la kynjoh haduh 1 lak 14 hajar. Ym tang katta hynrei kaba sngew lyngngoh ka long ba ha kitei ki bill ym shym la don kino kino ki jingpynshai bniah, kaba pynshisha la ki dei naduh u snem aïu. Pynban nalor kata ka bill kaba la pynkyndit, la don ruh ki kyntien byrngem ban phah kem pulit lada ym siew ïa kitei ki bill.
Haba ïadei bad kane ka jingjia ka seng HNYM West Khasi Hills District hapoh ka jingïalam u bah Tailan Lyngkhoi Lamphang ka seng HNYM, ka la leit ban tuklar ïa kane ka kam.
Hynrei u bah Tailan u la ïathuh ha u nongthoh khubor ba na ka liang jong ki bor pynïaid jong katei ka ophis, kim shym la ai kano kano ka jingpynshai phewse ki la kynnoh beit ba ka dei ka jingleh na ki bor kiba kham halor.
Ka seng hi kan ym aili bad kan leh da kaba tyngeh ïa kane ka tnad bad ka dawa ruh ïa ka sorkar MDA ba ka dei ban da pynshai bha, shwa ban shim ïa kano kano ka rai ka ban pynïap pynkordit ïa ki paidbah khamtam ki paidbah nongkyndong jong ka District. Ka seng kan ïai buddien ïa kane ka bynta, ong u nongïalam jong ka seng.
