Jowai, Naiwieng 05: Ka Seiñ Raij, Jowai ha ka sngi Baar ka la noh synñiang jingïarap pisa 1 lak tyngka sha ka Chief Minister’s Relief Fund (CMRF) da kaba aiti ïa ka Cheque ha u Symbud Myntri Rangbah ka jylla u Bah Sñiawbhalang Dhar.
Kane ka jingnoh synñiang jong ka Seiñ Raij Jowai ka long kum ka jingïarap ïa ki lanot shlei um kiba la shah ktah ha ri-lum Garo. Ïa ka Cheque la aiti da u Vice President ka Seiñ Raij Jowai u Bah EMH Passa ryngkat ka jingsakhi lang jong u General Secretary u Bah Arwotki Sumer, u Asst. Secretary u bah Wyraiki Kharbuki bad kiwei.
Kum ban shu pynkynmaw, u Myntri Rangbah ka jylla u Conrad Sangma u la pan jingïarap na ki paidbah ban noh synñiang jingïarap lem sha ki lanot kiba la shah ktah na ka jingshlei um ha rilum Garo ha kaba 17 ngut ki mynsiem ba kordor kiba la duhnoh ïa la ka jingim.
