1 lak ïarap u MLA ka Nongpoh ïa ka Christian HSS shuwa ban leit ïashim bynta ha ka Subroto Cup ha Delhi
Nongpoh, Naitung 26: U MLA ka Nongpoh u Bah Mayral Born Syiem mynta ka sngi u la ai ka jingkitbok kitrwiang ïaka kynhun ïalehkai phutbol ki kynthei jong ka U-17 ka Christian Higher Secondary School Nongpoh hadien ba katei ka kynhun kala rah ïaka nam lahduh haka State Level Subroto Cup 2024 bad mynta kala pynkhreh pat ban mih khmat ïaka jylla sha ka 63rd Subroto International Football Tournament kaban sa long shen ha nongbah Delhi.
Ha katei ka sngi naka liang u Bah Mayral Born u la aiti ruh da ka song pisa kaba 1 lakh tyngka sha ki bor pynïaid skul jong ka Christian HSS ba kin ioh ban pyndonkam haka leit ka wan haka por ba ki leit shim bynta sha katei ka lympung bad hakajuh ka por naka liang ki bor pynïaid skul kila pynkup burom ruh ïakitei ki thei ïalehkai jong ka skul.
La sakhi ruh ha katei ka sngi da ka jingdonlang u Bah Balajied Ranee MDC ka Nongpoh, ki nongïalam shnong ka Pahamsyiem, ki bor pynïaid skul jong ka Christian HSS, ki thei ïalehkai jong katei ka skul lem bad ki kmie ki kpa.
Haba ai jingkren ha kane ka sngi, u Bah Mayralborn Syiem u la pynpaw ia ka jingsngewsarong kaba khraw ba ha kane ka kynti, haduh lai tylli ki skul ka Ri Bhoi ki la ioh ïa ka nam lahduh ha ka State Level Subroto Cup kaba la long dang shen ha nongbah Shillong bad kitei ki kynhun kin leit pat ban mihkhmat ïa ka jylla sha ka 63rd Subroto Cup International Football Tournament 2024 ka ban sa long shen ha ka nongbah Delhi bad Bangalore.
U la ong ruh ba kam dei ka kam kaba suk ba ki thei bad rang ialehkai ka Ri Bhoi kin ioh ia katei ka jingjop, lymda dei lyngba ka jingtrei shitom bad ka jinglen lade ka jongki, watla ka Ri Bhoi kam don satia ia ki jaka ialehkai kiba paka kumba don ha ka nongbah Shillong.
U Bah Mayralborn Syiem u la ai ia ka jingkitbok kitwriang ïa ki thei ialehkai ka Christian Higher Scondary School bad ruh ia ki ar tylli kiwei pat ki skul kiba kynthup ia ka Mynken Christian Higher Secondary School ka ban mihkhmat ha ka kyrdan U-17 jong ki shynrang bad ka Nongjri Presbyterian Secondary School kaban mihkhmat ha ka kyrdan U-15 jong ki shynrang ba kin poi sha ka thong jong ka jingjop ba kan long ka burom kaba khraw ym tang ïa kitei ki skul, hynrei ïa ka District bad ka jylla hi baroh kawei bad kular ruh ba un sa iakren bad ki bor ba dei khmih jong ka tnad ïalehkai ka jylla ba kin shimkhia ban pynbiang ïa ka bam ka dih jong kitei ki thei bad ki rang ïalehkai jong ki skul ka jylla ha nongbah Delhi bad Bangalore bad ruh ban pynioh ïa ki jaka sah kiba biang.
Ha kajuh ka sngi, u Bah Mayralborn Syiem u la aiti ruh ia ka Work Order kaba T. 3 lak sha ki bor pynïaid skul jong ka Christian Higher Scondary School na ka bynta ban pyniar shuh shuh ïa ka ïingskul na ka bynta ka jingmyntoi jong ki khynnah pule.