1 klur tam mang ka sorkar ban tei ïa ka Multi Facility Center ha Tyrso naduh u snem 2017, sah khongreng khlem lah pyndep

Nongpoh, Jylliew 07: Ki nongsengbhalang ba kynthup ïaka KSU Tyrso Unit, ka FKJGP Tyrso Circle, ki nongïalam shnong ka Raid Tyrso lem bad ki nongïalam ka Tyrso Valley Wildlife Protection Society mynta ka sngi kila leit ban jurip ïa kawei ka jaka kaba ka sorkar kala thmu ban tei ïaka Multi Facility Center haka shnong Tyrso naka bynta ka jingdonkam ki paidbah ha katei ka thaiñ, hynrei la lap ba katei ka skhim sorkar kala shu sahkut khongreng khlem lah pyndep haduh mynta.
La ioh jingtip ba ïa katei ka skhim sorkar la mang naduh u snem 2017-18 haka jinglut kaba 1 klur tam, kaba la thmu bad buh por ban pyndep tang hapoh 2 snem hynrei kaba sngew lyngngoh ka long ba haduh mynta katei ka skhim kala shu sakhut khongreng ym pat lah ban pyndep kumba la thmu kaba la pynbitar ïaki nongïalam sengbhalang bad kumjuh ruh ki nongïalam shnong.
Naka liang ki nongïalam ka KSU bad FKJGP ba kynthup ïa u Samla Balajied Sten bad u Samla Fleming Sten ryngkat ki nongïalam shnong kila ïathuh ba ïa katei ka jingtei ïakatei ka Multi Facility Center la buh por ban pyndep tang hapoh 2 snem bala wanrah ruh naduh ka por ka jingsynshar jong ka sorkar Congress haka jylla ban kyntiew ïaki kam pynroi ha katei ka thaiñ bad khamtam haka kam jngohkai pyrthei kumba katei ka shnong ka dei ruh kaba pawnam halor ka jingwan buhai shnong jong ki sim Amur Falcon shisien shisnem, hynrei la sakhi ba kat haduh kine ki sngi katei ka jingtei kala shu sahkut khlem pyndep shuh kaba la buh ïaki nongïalam shnong bad nongïalam sengbhalang hapdeng ka jinglynngoh ba u kontraktor u la shu ieh jyndat ïaka kam.
Naka liang kitei ki nongïalam seng bad shnong kila dawa naka sorkar ba kadei ban tuklar bad ban bthah ïa u kontraktor ba pyntrei ïa katei ka kam ba u dei ban pyndep noh mardor khnang ba katei kan long ka jingmyntoi ïaki paidbah ha katei ka thaiñ namar katkum ka por bala buh katei ka skhim sorkar kala dei ban ieng ha katei ka jaka bad ban dep noh, hynrei mynta la shu iehnoh khlem leh eiei shuh.