Shillong, Naitung 12: Ka jingkhraw ka nusib uwei u rangbah u ba la tip kyrteng da u Bah Paulus Marwein na Lumparing ka paw pyrthei mynta ka kynti ha kaba u la jop ïa ka khalai nusib kaba kot haduh 1 klur tyngka ha ka 12 tarik u Naitung. Ïa kane ka khalai nusib jong ka Dear Weekly Lottery u Bah Paulus u la thied ïa ka tiket na ka dukan ba die tiket ha Laban, Red Cross.
Bah Paulus u dei uba nyngkong tam ha ka jylla ban jop ïa ka khalai nusib kaba kot haduh shiklur tyngka na kane ka rynsan kaba u la jop mynta.
U Bah Paulus Marwein u la rangbah briew uba ka rta ka la kot sha ka 60 snem tam eiei, u ong ba kane ka jingjop jong u ha ka khalai nusib ka dei ka ka jingkyrkhu kyrpang kaba u ïoh na u Blei. U la ong ruh ba da kane ka jingjop jong u ha kane ka khalai nusib u kyrmen ba kan long ka lad ban ïoh thied jaka ban thaw ïing noh namar baroh shi katta ki shu shong ïing wai.
Ha ka 12 tarik ki nongtrei jong ka kompeni Descent Reality LLP kaba la pynïaid ïa kane ka khalai nusib ki la wan lang ha katei ka dukan ban ai ïa ka check ha u Bah Paulus khnang ba un ïoh sei ïa ka ïa ka pisa kaba u jop bad ki la ïathuh ba kan shim por kumba ar bnai eiei ban pyndep ïa ki kot ki sla ha shuwa ban ïoh ïa ka pisa, bad katkum ka jingïathuh jong ki, une u nongjop u ïoh ïa kane ka pisa lyngba ka jingkhalai nusib ba lah leh na Nagaland bad ka pisa kan wan na katei ka sorkar.
Haba kren pat bad u trai katei ka dukan kaba la die ïa ka ka tiket sha u Bah Paulus, u la ïathuh ba kidei shiparalok bha, u la ong ba kane ka tiket ba u shim u Paulus ka dei kaba khatduh sa ban lut noh. Shuh shuh u la ïathuh ba barabor ki ju don kiba jop tang 40- 50 hajar, hynrei kane ka long ka sien kaba nyngkong wat ha jylla baroh kawei ban don nongjop haduh 1 klur ha kyrdan ba nyngkong ha kane ka khalai nusib.
