Shillong, Jylliew 18 : Ka Garo Student Union (GSU) Rongkon Unit ka la pyntip ba ka thaiñ Rongkon bad Chigitchak kiba hap hapoh ka Dadenggre Sub Division ki la shong dum mynta la shibnai lynter namar ka jinglip ka bor ding ilektrik.
Kat kum ka jingpyllait khubor u President katei ka unit u Nasen Ch Momin ula pynpaw ba kane ka jinglip bor ding ba la shibnai lynter ka la wanrah bun ki jingeh ïa ki paidbah khamtam iaki khynnah skul. Namar mynta bym don bor ding ban charge ïa ki mobile phone ruh ym long kumta ban phone ruh kim ïoh shuh ban pyndonkam lada don kino kino ki jingjia ruh. Wat ki samla pule kiba pass ïa ka SSLC bad HSSLC kim lah ban sei ( download) ïa ki marksheet jongki namar bym don bor ding ilektrik ban plie ïa ki kor komputer. Mynta sa ka eksamin shiteng snem ruh la poi bad ki khynnah skul kim ïoh ban pule kot mynmiet.
Kumta na kaliang ka seng ka kyntu ïa ki nongtrei ka MePCL ba kin shim khia ban pynbiang bor ding ilektrik noh sha katei ka tahiñ namar ka la ktah jur palat ïa baroh.
