Nongpoh, Jylliew 27 : Namar ka jingma kaba ap ïaki paidbah, ki khyllung khynnah bad kumjuh ruh ki mrad ki mreng naka jingshah bat bording elektrik naka bym don jingker eiei uwei u transformer ha ka shnong Umtangar haka thaiñ Western Ri-Bhoi, ka Federation of Khasi Jaiñtia and Garo People (FKJGP), Western Zone kala ai por syndon 1 bnai ïaka tnad MeECL ban ker ïa utei u transformer shuwa ban jia ki jingjia ba sngewsih.
Naka liang u Bah C Doloi President ka FKJGP Western Zone u la pynpaw ba kum ka seng ka dap da ka jingsngewkhia halor ka jingbym shimkhia jong ka tnad MeECL ban ker ïaki transformer kumba ki jingjia ba sngewsih ki ju jia naka por shaka por bad utei u transformer ba don haka shnong Umtangar u dei u bym don jingker eiei bad buh jingma ïaki paidbah khamtam ki khyllung khynnah bad ki mrad ki mreng.
U la ong ruh ba ka tnad ba dei peit kam dei ban ap haduh ban da jia ki jingjia ba sngewsih hynrei kum ïa u transformer donkam ban ker ban lait naka jingma ïaki paidbah bad lada ka tnad ba dei peit kam shimkhia naka liang ka seng kan sa shim pat da kiwei ki sienjam.
