1, 68,853 lak kiew ka jingdon ki nongthep Vote ki 4 Constituency ka West Jaiñtia Hills

Jowai, Risaw, 29: Ïa ki Draft Electoral Roll jong ki saw tylli ki Assembly Constituencies kata ka 1-Nartiang, 2- Jowai, 3- Raliang bad ka 4- Mowkaiaw la sam ïa ki mynta ka sngi sha ki nongmihkhmat jong ki kynhun saiñhima sima bapher bapher, haka jingïalang bala pynlong ha Conference Room jong ka ophis u Deputy Commis-sioner Jowai.
Ha kane ka sngi la ïadonlang da ki Additional Deputy Commissioners ba kynthup ïa ka kong HML Kynta, kong B. Blah bad ka kong D V Lyngdoh, lem u Assistant Commissioner ma F. Passah.
Haba ai jingkren ka D.V Lyngdoh kala batai ba la dep pynkhreh ïa kane ka Draft Electoral Roll ka long kyrpang na ka bynta ka jingpynrung kyrteng thymmai ïa kito kiba la kot sha ka 18 snem shaneng katkum ka qualifying date 01.01.2024, ka la ong naduh ka 29th October haduh 28th November, 2024 ki nongshong shnong kiba la don kyrteng ki lah ban wan ujor ban pynbeit lada don kino kino ki jingbakla.
Ka la pyntip ïa ka Special Camps yn pynlong ha u bnai November jong ka 15, 16, 21 bad 22 tarik November, 2024, na ka liang ki BLOs, AROs, EROs kin sa leit rung sha manla ki Polling Stations ban ïa kynduh ïa ki paidbah. Kan don ruh ki prokram ai jinghikai ïa ki paidbah halor ka Electoral Revision Process bad ban pynsngewthuh ïa ki nongshong shnong halor ka hok thep vote jong ki. Ka jingpdiang ïa ki jingujor ka long haduh ka 24.12.2024 bad ka jingpynmih ïa ka Final jong ka Electoral rolls kan long ha ka 06.01.2025.
Shuh shuh ka kong Lyngdoh kala pyntip ba ka jingdon jong ki nongthep vote kaba nang kiew katkum ka Draft Electoral Roll bala pynlait mynta ka sngi, la ïoh jingkheiñ ka jingdon ki nongthep vote hapoh kitei ki saw Constituencies kala kiew sha ka 168,853 na ka 166,728 ïa kaba la dep pyllait haka 05.01.2024
La ïathuh ka jingdon ki Polling Stations ha kine ki 3 tylli ki Constituencies ba kynthup ïa ka Jowai, Raliang, Mowkaïaw kin long kumjuh hi 57, 55 bad 55 PS. Katba ha Nartiang Assembly Consti-tuencies la pynmih sa kawei ka Polling Station kaba la kynjoh sha ka 64 tylli ki PS.
Na ka liang u ma N Garod, District Housing Officer, Jowai, ma G. Rani, Assistant Director Border Area Development Officer, Jowai, ma Iaidbha Phawa, Assistant Research Officer, Jowai bad ki nongtrei ka Election Branch kila wan ban donlang lang mynta ka sngi.
Ha kane ka prokram la aiti ïa kitei ki Draft Electoral Rolls sha ki nongmihkhmat na ki kynhun saiñ hima sima kiba kynthup na ka VPP, NPP, BJP bad UDP.