Shillong, Naiwieng 11 (PIB): U Myntri Sorkar Pdeng ba dei khmih ïa ka Tnat Road Transport and Highways, u Nitin Gadkari mynta ka sngi u la pynbna ka jingpyllait ïa ki projek ba thymmai ba shongdor T. 1.6 lak klur ha ka thaiñ shatei lammihngi.
Ha kaba kut jong ka jingialang bad ki lad pathai khubor na ka bynta ka jingïalang peit bniah ia ki projek Surok bah ha ka thaiñ shatei lammihngi kaba la long ha nongbah Guwahati, Assam u la ong ba kine ki projek ki kynthup ïa ki surok, ki Ropeway, ki sutok na jrong jingkieng, ki jingkieng ba kongsan ha kylleng ka wah Brahmaputra bad kiwei kiwei ki jaka shong um. U Gadkari u la ong ba la tyrwa ruh ïa ki Multi Modal Logistics Park ha Udaipur ha jylla Tripura bad Silchar ha jylla Assam.
U Gadkari u la ong hapoh ka jingïalam ba ïohi jngai jong u Myntri Rangbah duh, u Narendra Modi ngi trei na ka bynta ban pyndap ïa ka jingduna ha kaba ïadei bad ka jingpynïasoh ha ka thaiñ shatei lammihngi bad kyntiew ïa ki jingdon jingem ba ïadei bad ka leit ka wan ha ka thaiñ.
U Myntri u la ong ba la shna kumba 50 tylli ki Way Side Amenity bad 50 tylli ki View Point. Shisien ba kine ki la dep, kan kyntiew ïa ki kam jngoh kai bad ka ïoh ka kot ha ka thaiñ shatei lammihngi, u la bynrap.
Na kane 1.61 lak klur tyngka, ka Meghalaya kan ïoh sa 616 Kilometer bad ka jingmang pisa ka long 12,500 Klur tyngka. Ki surok kiba dang trei mynta lyngba ka Road Transport and Highways ki long 281 KM ha ka jingmang pisa kaba 3819 klur tyngka. Katba kiba ladep pat ki long 350 Km ha ka jinglut kaba 2480 Klur tyngka.
Katba ki surok kiba deiban shna nalor jingkieng ki long 10 tylli ha ka jingmang pisa kaba 32 klur tyngka.
