Shillong, Naitung 31 : Ka jingap khmih lynti jong ki paidbah ka thaiñ Byrnihat ban ioh ïaka jaka theh ñiut kaba paka ne ka Solid Waste Management kala urlong hadien bun snem, hadien ka National Clean Air Programme jong ka Ministry of Environment, Forest and Climate Change (MoEF&CC) ka la mang pisa haduh 1.46 klur ban shna ïaka Solid Waste Management ba paka ban weng lut ïa ki jaboh kiba la pynisih bad pynisaitmet ïaka thaiñ haka thaiñ Byrnihat baroh kawei.
Naka liang ka ophis jong u Block Development Officer, Umling C&RD Block hapoh ka jingïalam jong u Bah Eric K Dkhar BDO kila lum ruh ïaki nongïalam shnong mynta ka sngi ha byrnihat haka jingdonlang u MLA bad MDC ka Jirang u Bah Sosthenes Sohtun ban ïakren sani shuwa ban pyntreikam ïa katei ka skhim ha katei ka thaiñ bala wan ruh ban shim bynta da u Paiem Ken Syiem, Syiem ka Raid Marwet, ki nongmihkhmat ka Greentech Foundation, lem bad ki nongïalam shnong naki 20 tylli ki shnong kiba don haka thaiñ Byrnihat.
Ha kane ka sngi naka liang u bah Eric Kevin Dkhar, BDO ka Umling Block u la ïoh ban batai sani bha halor ka jingpyntreikam ïa kane ka Project bad kumno yn thaw thymmai ïaka thaiñ Bynrihat ban lait naka jingsatah ki jaboh nalor ka jingiohnam jong ka shnong ba jur tam ka lyer jaboh.
Haba kren sha ki lad pathai khubor naka liang u Bah Sosthenes Sohtun MLA ka Jirang, u la ong ba ha katei ka sngi la ioh ban kren sani bha ha kaba ïadei bad ka khuid ka suba namar kumba long haduh mynta ki paidbah kim hun bad kim sngewtynnad ïaka jingiohnam jong ka thaiñ kaba jaboh tam.
Hynrei ka long pat ka jingkmen kaba khraw hadien ba ka National Clean Air Programme kala mang pisa haduh 1.46 klur ban tei ïaka jaka bret ñiut kaba la donkam eh ha katei ka thaiñ ban ïaleh kumno ban pynduna hakaba ïadei bad ka jingpynsaphriang ïaki jakhlia bad ki mar plastic kiba mih na kane ka thaiñ.
Kum u nongmihkhmat u la ong ruh ban pyntreikam pura ïa kane ka project donkam ka jingïasnohkti lang kadiang bad kamon jong ki nongïalam shnong, ki paidbah nongshong shnong bad kumjuh ruh ki nongshong wai ban sdang ruh ïaka jingthaw dur thymmai ïaka thaiñ Byrnihat, bad ban ong em ïaka plastic, bad ban kitkhlieh noh ban wanrah ïaka khuid ka suba.
