Shillong, Nailar 14: Hadien ba ka lympung ïalehkai phutbol Third Division 2024 ka la nang jam shakhmat, bad ka kyrdan Fourth Division ka sah satang 2 tylli ki jingïakhun ba dang sah, ka Shillong Sports Association ka la pynbna ba kan sa sdang noh shen sa ïa ka kyrdan ïalehkai Second Division 2024 ha ka 02 tarik mynta u Nailur.
Mynta ka kynti kin don 13 tylli ki kynhun ki ban ïashimbynta bad la phiah ïa ki ha ar tylli ki Group (A bad B), kawei ka Group ka kynthup hynriew tylli ki kynhun katba kawei pat 7 tylli.
Ha ka Group A la bynta hynriew tylli ki kynhun, ba kynthup ïa ka Meghalaya Police, Sohiong SC, Umphrup SC, Smit SC, Laitkyrhong SC bad ka Imson SC. Nangta ka Group B ka don hynñiew tylli ki kynhun, ka Pay For Right Football Academy, Mylliem Lum SC, Jongksha SC, Nongkrem SC, Marbisu SC, Laitlyngkot SC bad ka Lumshyiap SC.
Ka SSA ka la ïoh ban pyllait ïa prokram ïakhun kiba haduh 9 tylli ki jingïalehkai na bynta baroh ar tylli ki Group, bad baroh ki jingïakhun yn pynlong ha SSA Stadium, Polo.
Katkum ki kyndon, tang ar tylli ki kynhun ba poi kyrdan ba nyngkong bad ba ar kin ïohrung sha ka wat ïakhun semifinal. Bad ki ar kynhun ba poi sha ka final kin ïoh ïakhun ha ka kyrdan First Division na bynta ka aïom ban wan, katba ka kynhun kaba wan ha traiduh na baroh ar Group kin shah pynhiar kyrdan sha ka Third Division ha u snem 2025.
Kumban shu pynkynmaw, ka PFR kaba la rah ïa ka Third Division ha u snem ba ladep, bad ka Mylliem Lum (Runner Up), ka Meghalaya Police (kaba shah rem ha ka semi final) ki dei ki kynhun kiba thymmai ban ïakhun ha ka 2nd Division mynta u snem. Kawei pat ka kynhun kaba poi semifinal ha ka 3rd Division ha u snem ba ladep, ka dei ka Nongkseh hynrei kam shym la don satia ha ka thup ki kynhun ban ïakhun ha ka Second Division mynta u snem. Watla kata, kumba la sakhi ïa ka Nongkseh kaba la soi shibun ki player ba kynsai ha ka inter-club transfer window, ka lah ban long ba ka Nongkseh ka la ïoh ban thied ïa ka jaka ba thylli ha ka First Division ba la lilam da ka SSA.
Namar ba ka SSA ka la pynsangeh ïa ka jingpynhiar kyrdan ïa ki kynhun ha ka samoi 2023, te yn nym don ki kynhun 1st Division kiba la shah pynhiar ban ïakhun ha ka 2nd Division mynta u snem.
Kumba la kdew, ki jingïakhun kin sdang naduh ka 02 tarik u Nailur, bad yn plie pyrda ïa ka jingïalehkai ba nyngkong na ka Group A, ha kaba ka Meghalaya Police FT kan aireng ïa ka Sohïong SC ha ka por 1 baje mynsngi, nangta ka jingïakhun kaba ar ha ka por 3:45 nohphaisngi hapdeng ka Umphrup SC bad ka Smit SC.
Baroh ki jingïalehkai yn pynlong ha madan SSA Stadium, Polo.
