Kwah u BDO ka Zikzak ban kyntiew kyrdan ïa ka Border Haat ha Kalaichar

16 April, 2018

Ampati, 15 April: Ka tnat Cooperative jong ka Sorkar Jylla, ha ka sngi saitjaiñ ka la pynlong ïa ka jingai prokram ïathir na ka bynta ki Cooperative Societies ha ka sngi saitjaiñ ha Zizak C&RD Block Multi Facility Centre, South West Garo Hills. Palat 200 ngut ki dkhot jong ki Cooperative Societies ki la wan ïashim bynta ha kane ka sngi.

Haba kren kum u Kongsan, u S.Ch Sangma, Block Development Officer (BDO) ka Zizak C&RD Block, u la kyntu ïa ki nongïashim bynta ba buddien thik pa thik ïa ki jingai jingtip ba la ai da ki ophisar jong ka tnat Cooperative.

U Sangma u ïathuh, ïa mynta ka Ïew Khappud ha Kalaichar ka dei kaba pynmyntoi ïa ka ïoh ka kot jong ki shnong kiba don hapoh 5 kilomitar na khappud. U BDO u la ong lada kyntiew kyrdan ïa kane ka ïew khappud ha ki snem ban sa wan kan sa kham la ban jingshakri ïa ki paidbah kiba sah pan san kilomitar ban ïadie ïathied ha kane ka ïew.

U la kyntu ïa ki seng trei mon sngewbha ba kin pynrung ïa ki kynthei ha ka kynhun jong ki khnang ba kan ym don kano kano ka jingpynïapher ha kaba ïadei bad ka jingïadon ki dkhot jong ka kynhun.

Ka Sorkar ka la buhthong ban ai ïa ki lad ba mar ïaryngkat. U ong ba ka ïew khappud ha Kalaichar lada kyntiew kyrdan kan ïarap ban khring ïa ki paidbah sha kane ka ïew ban die bad thied ïa ki marrep ba pynmih na kane ka distict bad ban pynïaid ïew ruh wat sha ka ri Bangladesh lyngba kane ka ïew khappud.

Shwa kane, AGA Sangma Assistant Registrat, ka tnat Cooperation ka West Garo Hills, la kren halor ka bynta ba kongsan jong ki Cooperative Societies bad ïa ka thong kaba ki don ban kyntiew ïa ka ïoh ka kot jong ki paidbah ha kane ka thaiñ.