Kynnoh ka FKJGP ba siang torti ïa ka surok

Shillong, Lber, 21: Ka Federation of Khasi Jaiñtia and Garo people (FKJGP) Umïam Circle mynta ka sngi balang ka la hiar jurip ïa ka jingsiang rong ïa ka surok kaba pynïasoh na Shillong sha Umïam Khwan bad kam ruh ba ka jingsiang rong ïa kane ka surok ka long kaba shu leh torti. Ka Seng hapoh ka jingïalang jong u Bah Lambha Kurbah, President ka la kynnoh ba ka la lap ba ka jingsiangrong ïa kane ka surok ka long kaba shu trei torti khem da bud ïa ka hukum ba la bthah National Highway Authority of India (NHAI).
“Ka NHAI ka la pynmih ïa ka hukum ban siang ïa ka surok ha kaba ka jingrben jong ka kan dei ar inshi ha ka jingsiang ka banyngkong bad ban siang biang nalor sa shi inshi,” ong ka Seng
“Hynrei katkum ba la shem ka jingsiang rong kam long katkum ba la bthah, pynban la pyntrei ïa kane ka surok tang mar shiteng na kaba la bthah da ka NHAI,” ong shuh shuh u kyrwoh ka seng.
“Ngi dawai ba ki bor badei peit jong ka NHAI kin wan syntiat bad jurip hi dalade ïa ka rukom siangrong ïa kane ka surok kaba la pyntrei da u Kontraktor ba la tip kyrteng, u Singhania namarba ngi kwah ban suk ka leit ka wan,” la ong shuh shuh u kyrwoh.