Buh Kyndon Ki Seng Riewlum Ban ïatylli

(Bah I. R. Dkhar)

19 June, 2017

Ha kaba nyngkong, haba ngi ïohi na ki Kotkhuborba u Bah H.S. Shylla, MDC, Nongkrem u la pynpaw ïa ka jingkwah ban ïatreilang hapdengka UDP, ka Seng kaba u don bad ka HSPDP, ka la don kajingkmen bad jingkyrmen ba kine ki artylli ki Seng riewlum kin poi sha ka thong ban ïatylli. Hynrei kane ka jingïatylli ka don da ka kyndon, kumba ngi ïohi na ki Kotkhubor, kata ka long tang ka pre-poll alliance, ka jingïakut ban ym pynïeng nongïaleh ne kandidate shuh, da ka UDP lada la pynïeng nongïaleh ka HSPDP ha kano kano ka constituency. Kan long kumju hruh, lada ka HSPDP ka pynïeng nongïaleh, ka UDP kan ym pynïeng nongïaleh shuh ha kano kano ka constituency.

Kajingthmu jong ki, ka long ban pynjop ïa u nongïaleh jong kine ki ar party pyrshah ïa Seng Congress ne ka BJP ne ka NPP ne kano kano ka National Party.Tip, ynda la jop pat kin ïaleh kumno. Hato kane ka jingïakut kan poi sha ka jingïatylli ne kan mih pynban ka jingbym ïasngewthuh-jingmut hadien habud? Kano kano ka Party kumba long ki Seng, ki don la ka nongrim bad u President uba long u khlieh. Une u President u don la ki Nongkitkam kiba ïatreilang bad u. Kine ki nongkitkam, ki nong ïatreilang ne ki party workers bad kipaidbah nongkyrshan, ki kohnguh ïa ka jingpynïaid jong u President bad ki Nongkitkamjong u. Kane kadei ka aiñ, ka riti ka dustur bad ka rukom jong kano kano ka Seng, la ka long ha kiNiam, ki Jingïasyllok ne ki Organization bad kiwei kiwei. Kadei ka jingkohnguh kaba ïalam sha kajingïatylli.

Haba ngi ïohïa kane kajingthmu jong kitei ki arSeng, kiba la pyrshang la katto katne bnai, kumba la thoh ha ki Kotkhubor, mih bluit u Bah H.S. Shylla uba kwah ïa ka jingïatylli da kaba pynpaw paidbah ba un ym ïaleh elekshon shuh na Nongkrem Constituency, ka Constituency kaba u long Nongmihkhmat kum u MDC, khnang ban ailad ïa u Bah Ardent Miller Basaiawmoit na ka HSPDP ban ïaleh khnang ba un ïakhun beit ïa ka Congress ne kano kanoka Seng, ban pynjop ïa u. Hynrei tang kattokatnesngi, u Bah Shylla u kylla ktien da kaba wohnia da kumne kumtai, hana ba ka UDP ka khlem kynjoh ktien ïa kiwei pat kiNongïalam kaSeng jong u bad ïa ki Nongïalamjong ka HSPDP. Katba ha ka CEC jong kinek ïartylliki party, ki la dep mynjur lang ban don ka jingïatreilang, kaba mut ba baroh ki Nongïalam kila dep ïa mynjur. Ki nongkyrshan lei, ki la shu mynjur beit haba ïohi ïa ki Nongïalam ki thmu ïa kaba donkam na ka bynta ka jingbha. Kane ka pyni tang ka mynsiem khñiang bad kajingwad-dong jong une u MDC Nongkrem. Nangta, ngi ïohi ba u la rai ruh ban ïakhun beit ïa ka elekshon naNongkrem pyrshah ïa u Bah Ardent Miller Basaiawmoit, u kyrtongka HSPDP (Mawphor 12/6) na kawei pat ka party ne kum u riew shimet.

Katei ka jingleh jong utei u MDC, kalong ka jingleh khlehbieit, shiphang kumwei bad shaphang da kumwei. Balei ym pyrkhat shuwa ban leh, ban pyrkhat arsien shuwa ban kren kumba ong kaktien. Ka pynartatien bad pynshaïong-jingmut ïa u paidbahuba kwah ban don ïa ka jingïatreilang. Kane ka jingïatreilang, lehse, kan wanrah ïa ka mynsiem ïatreilang kaba mut ban poi sha ka jingïatylli hadien ka elekshon. Kane kadei ka jingkyrmen jong u paidbah. Ban ong ba ka KHNAM bad lehse, ka PDF (ka seng kaba mih thymmai mynta), kam kwah ïa ka jingïatylli, ka long tang ka jingtharai-da-kumwei, ka jingwad-dong ne ka jingtih-tynrai ban thaw ïa ka jingïashun ne jingbishni. Kine ki arSeng kidei ban pyni shuwa ïa ka jingiasngewthuh-jingmut, kajingïamap ne jingïaklet noh ïa kaei kaba la dep bad ban ïalong noh kawei. Kiwei pat ki party ki kwah ban ïohi ïa kane. Ka jingwan ïasoh jong kiwei pat ki party hapoh kawei ka jingïalong kawei, kan satrei-la-ka treikam hi haba ïohi shuwa ïa ki ar.Kaba kongsan ka long ba kine ki ar party (UDP & HSPDP) kidei shuwa ban ïatylli.

Kajingkwah hi jong u paidbahka long ba ki la ngiah ïa ka Congress, kaba synshar haduh mynta ïa ka Jylla namar la jyrsieh tang da ka jingbamsap. Ka jingroi jingsan ne jingïaid shaphrang ne development ka ktah jur bha namar la jur ka bamsap, la jur ka noh shiliang, la jur ka jinglalot katba u duk u suk u jynjar ha ka jingïoh jingim, ka khih ka khan ka pynpulom.Kaba ima bad kaba kham sniew pynban ka long ba kan ym long kumba ngi kwah. Bad kiwei pat ki party, kiba pyrshah ne khanglad ïa ka dohmasi ne ïa kiwei pat ki jait jingbam jong ki riewlum, kajingngeit niam bad ka mane Blei, ka ktien ka thylliej bad kiwei kiwei ki riti dustur jong u riewlum. Ioh ka Seng kaba ngim kwah, kan wan biang pynban ha ka bor ban synshar. Ngam tharai ba ki Nongïalam kim sngewthuh ïa kane. Kaei kaba pynlong ïa ka jingbymïatylli, dei ma ki hi namar kim kwah ban pynduh ïa ka tiphok tipsot, ka tipbriew tipblei ne ki ai lad ïa ka pyrkhat lamwir-lambieit ym kum ka saiñdur jong U Blei NongbuhNongthaw.

Kapor ka la jan ngong-ngong na ka bynta kitei ki arSeng ban shong pyrkhat noh khlem pynslem. Jied ïa ki nongïakhun kiba biang, kiba shemphang, kiba ïohi jngai, kiba nang ba tip ïa ka saiñ pyrthei na ka bynta kajaidbynriew ha kajingïadei bad ka pyrthei India. Weng ne pynpep noh ïa ki player kiba la rim ne ki bym ilah shuh ban ïaleh. Ai lad ïa kiwei ki riew samla, ki riew shemphang, ki riewstad riew nang.Ki don bun bylla i kum kita tang ba donkam ban leh ïa kaba donkam. Ym donkam ban batai. Ngi kwah shisha ïa ka jingkylla naduh ki nongïalam ki ban long MLA sha ka Dorbar Thaw Aiñ kaJylla Meghalaya. KaJylla bad kajaitbynriew ruh ka dei ban kylla ha ka jingroi jingsan, ha ka jingkiew irat ha baroh ki liang katkum ka jingstad kajuk mynta khnang ban lah ban ïaleh ne compete bad kiwei pat ki Jyllajong ka ri India.