Thursday September 9, 2010
Shillong Edition

By Editor

Ka sem jong ka Congress hangne hapoh ka jylla mynta ka la sdang ba kan khih biang hadien ba ki katto katne ki MLA jong ka mynta ki la don ha Delhi ban leit ban pynsngew bad ban dawa syndon na ki heh jong ka AICC naka bynta ban weng noh ia ki Independent bad kumjuh ruh ia u kyrtong ba tang marwei ka KHNAM ne mano ba lah ban tip wat iaka seng UDP na kane ka sorkar ban plie lad pat ia ki ban ioh shong shuki.

Ka jingkhein naka bynta ka Congress hapoh iing durbar thaw ain ka jylla ka la long lypa kaba la kham bun paid, kampher wat lada ka dang duna satang khyndiat ba kan ioh ia katta ka kabu ba kan synshar hi marwei.

Ka jingkhih jong ki MLA ka Congress ka la kham mih paw bha khamtam lei lei na kito ki MLA barim bad kumjuh ruh na ki kyrtong kiba dang shu jop shen, pynban kum u nongialam ba ha khlieh duh hangne hapoh ka jylla u Dr D.D Lapang u don la ka jong ka jingthmu da kaba um kwah satia ban weng noh ia ki Independent, UDP ne wat ia ka KHNAM namar lada u lah ban kdup lang ia ki baroh khlem pep ka sorkar ka jong MUA kan long kaba skhem bad ha ka juh ka por ba kan khanglad biang sa shisien wat ia ka NCP ba kan ioh ban wanphai biang sha ka bor jong ka synshar hangne hapoh ka jylla.

Ka jingkhih biang ka sem ka Congress ka long kaba ima bha ia kane ka seng, bad kumjuh ruh ia u bah Lapang ba lada u weng noh ia ka jingkyrshan jong kitei ki seng ba la kdew haneng ruh ka jingma kan long ia u, lada um weng ruh khlem pep wat un shah pynsloit syndon ia ka shuki kum u nongialam ka seng hangne hapoh ka jylla, hangne kein mano baa p thap un dei beit na ki para dkhot kiba la ia kham ia rim jong ka seng.

Kumban shu pynkynmmaw ba ha ka elekshon kaba la dep, lehse u bah Lapang um shim la poi pyrkhat ba ki arngut ki briew ba la rim bha ba sa shisien kin jop biang ia ka elekshon sha ka iing durbar thaw ain, bad na ka por sha ka por kine ki riew rim ki don ha ki ia ka buit bad ka bor ban khring par ia ki paralok ba thymmai ban ia iarap lem ha kaban pynkhih ia sem jong ka seng.

Ha ki jingialang jong ka seng ha la ki constituency ne bad ki dkhot nongtrei ba shit rhem jong ka seng, ka ju don beit ka mat jingdawa (ba kynthup ha ka memorandum) ba dei ban pynioh shuki lem ia kine ki dkhot da kaba ki ioh ban rieh tngen naka bynta ban kyntiew ia ka roi ka par, ka ioh ka kot ne ban pynskhem biang ia ka party ha ki constituency.

Ha kane ka kynti kaba mynta ka jingkhih ki MLA ka Congress i kumba kan poi shisha sha ka thong, hynrei kim dei pat ban klet kaei pat kaban mih haba ki la ioh ban synshar tang marwei, khlem pep ki seng ba ia synrop lang haba ki la shong sha ka liang pyrshah kin shut pynnep bha ki reng ban sdang ban tih bad ban wohdong wohnia bha ia ka rukom treikam ka sorkar.

Kumba ka long ia mynta ka sem ka Congress wat lada kan nym pra, hynrei naka por sha ka por lehse u bah Lapang un nym ioh ban shong suk shuh ha ka shuki, namar um lah ban tip ba wat hapdeng ki para MLA kiba don lang ha syndah jong u kilah ban long ki nong kynshoit pat na kyndong kyndong. Tang kawei kaba kham itynnad eh ka long aiu ki heh ka AICC mynta ka kynti ki don ban leh, hato kin iaid biang da ka buit kumba ki la leha ha ka por u bah J.D Rymbai ban shu phah ia thep ia ki vote khlem da niew ia ki, ne ban weng syndon ia u bah Lapang na ka shuki tang ban pynskhem ia ka shuki jong ka seng hapoh ka jylla.

Lada long katba ka long ruh ka rai kaba khatduh hi kan dei beit napoh Delhi, hynrei ia mynta ka AICC lehse kan nym pat lah ban shim ia ka rai katba ka jingiashong dubar parliament kam pat kut, namar hangne ruh ka rai ban pynrung ia ka ain ban bhah kyrpang noh ia ki longkmie hapoh Lok Sabha ka dang sah teng kampher wat lada ka la ioh ia ka jingmynjur napoh ka Rajya Sabha. Da kumta ka jingleit lehse kan shu long shwa tang ban shu pynim biang ia ka ishu hynrei ban ioh ia ka rai ban wanrah ia ka jingkylla hapoh ka jylla ia mynta yn nym pat lah ban tip, tangba lada ka iai long sah kumne shi sien hi ka sngi khlem pep ka jingkylla ia ka Congress hangne hapoh ka jylla kan sa don beit.

 Web Site Designed and Maintained by SSNetCom Pvt. Ltd.