Monday September 6, 2010
Shillong Edition

By Our Reporter

Umsning, Lber : Ka Annual Sports Meet jong ka Skul Mari Bon Marweiñ Secondary Schol Lad Umpih, ka la sdang mynta ka sngi, ha kaba la plie ia ka da u MLA jong ka Umroi, u Bah Stanly Wiss Rymbai ryngkat ka jingiadon lang ki nongkitkam shnong na Lad Umpih bad Umjarong bad kumjuh ruh ki dkhot jong ka Managing Committee, ki nonghikai, ki khynnah skul bad ki kmie ki kpa.

Haba kren ha kane ka sngi, u Bah Rymbai u la ong ba u ju sngewtynnad ban wan sha ki jingialang jong ki skul kiba don sha ki jaka ba kyndong, la ka long ki jingialang sam prais ne ki jingialehkai sports namar kane ka long ka lad ia u ym tang ba un iohi ia ka jingiaid shaphrang jong ka skul, hynrei ban sneng ban kraw ia ki khynnah skul bad ban kyntu kynpham ia ki kmie ki kpa.

“Ba ka skul kan iaid shaphrang donkam ka jing trei shitom na ki khynnah skul bad ka jingiatreilang jong ki kmie ki kpa”, u la ong.

U la iaroh ia ki nongseng ia kane ka skul kiba la wan seng ha ka bynta kaba long khlaw bad wat lada kadei ka jaka ba kyndong, hynrei ka skul ka la nang iaid shaphrang bad ki khynnah skul ki la nang bun. “Nga ai burom ruh ia ki nonghikai kiba ym shym la tyngkai met ban wan hikai ha kane ka jaka kaba long khlaw”, u la ong.

Ha kaba dei bad ka jingia lehkai Sports, u la kyntu ia ki khynnah ba kin shim ia ka kum kawei na ki bynta ba kongsan ka jingim jong ki bad ba kan nym long shu tang ka jingialehkai, hynrei ka jingialeh ba shisha. U la pyn kynmaw ruh ba ka kam ialehkai sports mynta ka la long ka lad aikam aijam ia ki briew, namar ba wat ha ka por jong u namar ba u long u nongialehkai phutbol uba tbit ki team ba pawnam ka Railway, ka Town Club na Gauhauti ki la wan khot ia u ban ialehkai na ki da kaba kular ruh ban aikam ia u. Hynrei u la ong ba namar u angnud ban long u nongmih khmat paidbah um shym la leit.

U la kyntu ruh ia ki kmie ki kpa ba kin nym aidaw ia ka jingduk ba kan khang lad khang lynti ia ki ban phah skul ne phah pule ia ki khun ki kti jong ki.

 Web Site Designed and Maintained by SSNetCom Pvt. Ltd.