|
Ba thurmur ka tnat Pule, iakynduh ka DI ka JYF
|
By Our Reporter
Shillong, Lber: Ka Jaiñtia Youth Federaton (JYF) West Jaiñtia Hills hapoh ka jingialam u General Secretary ka seng u Bah W. NDkhar ki la leit iakynduh ia u D.I ka Jaiñtia Hills halor ki kam thurmur ba katei ka tnat ba shym la lah ban tehlakam ban pynbiang nonghikai ia ki skul kiba don ha ka thaiñ.
Ka seng ka la shim ia ka rai ban leit iakynduh ia u D.I hadiin ba ka seng ka la lap ba kawei ka skul kaba don ha ka shnong Muskut kam don nonghikai. U Bah Dkhar u la ioh lad ban iakynduh bad u Rangbah Shnong jong katei ka shnong bad u la ong ba ki nonghikai ba la phah na ka ophis u D.I ki wan ban hikai ha katei ka skul tang shitaiew bad hadien nangta utei u rangbah shnong jong katei ka shnong u la leit wad jingtip na ka ka ophis u D.I hynrei kim lah ban pynshisha ia u na kaei ka daw ba kitei ki nonghikai ki jahnoh khlem kino kino ko daw.
Hadien ba ka seng ka hiar juriap sha ka ohpis u D.I ka la lap ba ia kitei ki nonghikai la phah hikai ia ki sha kiwei pat ki shnong bad ia katei ka skul kaba don ha ka shnong Muskut la shu shah iehbeiñ khlem don mano mano ba peit iaki jingeh jong ki khynnah skul.
Ka seng dawa na katei ka tnat ba ka dei ban pynbiang nonghikai ia katei ka skul mardor lym kumta ka seng ka iaid shakhmat da ki jingiakhih kiba kham tyngeh, la bynrap u bah Dkhar.
Copyright mawphor.com
|
