Thursday September 9, 2010
Shillong Edition

By Our Reporter

Jowai, Lber : Ka jingshallan ia ki masi bad ki muid sha Bangladesh lyngba ki khappud kiba don ha Kuliang, Mukiang, Donaskul bad Rattacherra ka la long kaba jur bha bad halor kane na ka liang ki BSF ki la pynlong ia ka jingkhynra kaba jur bha ban ioh kurup ia ki jingri kiba thmu ban shallan be-ain sha katei ka ri ba marjan.

Ka tyllong khubor na ka thain Umkiang ka la iathuh ba ka kynhun ki BSF ki la hap ban ap miet ha surok bah ha lad Huroi ha Sunapur na ka bynta ban khynra naphang ia ki kali kiba kit masi bad muid bad bun ki masi bad ki muid kiba la shah kem bad kurup da ki shipai BSF ym tang haka thain Sunapur, hynrei kumjuh ha ka thain Rattacherra bad Malidor.

Ka rukom challan ia ki masi sha Bangladesh ka long kaba la leh da ki katto katne ki trai shnong kiba iatreilang bad ki nongkhaii kiba na Assam.

Ki BSF kiba ap ha u surok bah, kila hap ban kurup beit naphang namar ba ki tikna ba ki masi kiba kit bun trok haka shisngi ki dei ki masi kiba thmu ban shallan shabar wat lada ki nongkhaii ki pyni shai kdar ba kidei ki masi kiban shallan sha Kalain Assam lane Mizoram, pynban ynda poi ha Lumshnong, Kuliang, lane, Donaskul bad Umkiang ki pynhiar noh ia kitei ki masi ban pynkam shilliang pat sha Bangladesh.

Dei namar ba ki BSF ki la bat bad kurup ia kitei ki masi na u surok bah ka la don ka jingwoh daw na ki katto katne ki nongkhaii masi kynthup ia kiba na Assam bad kiba na thain Umkiang. U Abdul Suffan uba dei uwei na ki nongkhaii, u la iathuh ba ha kine ki khyndiat sngi, ki shipai BSF kiba la pynlong iaka jingkhynra kali naphang ha Sunapur kila kem ia kumba 16 tylli ki masi jong u kiba thmu ban shallan sha Kalain, Assam. Utei u Abdul u la iathuh ruh ba kitei ki Masi la thied na Assam (thain Guwahati) ha ka kyrteng jong ka kong Lina Bamon kaba na Umkiang, kaba dei kawei pat ka nongkhaii masi.

haba wad jingtip halor kane, ki riew paidbah na katei ka shnong ki la iathuh ba katei ka kong Bamon kadei kaba ju khaii masi be-ain sha Bangladesh.

Shuh shuh utei u Suffan u la iathuh ruh ba ha u bnai ba nyngkong mynta u snem ha ka 16 tarik, kawei ka trok (ASO1U-7735) ka ba kit masi ia u ka la duh noh ha jan Malidor bad ki BSF ki la wan ban kurup ia kitei ki masi jong u bad rah ia ki sha BOP. U la iathuh ba u la pyrshang ban iakren bad ki shipai BSF ban pynsngewthuh ba kim dei ki masi kiba thmu shallan sha Bangladesh, pynban kim sngap satia, u la iathuh.

Kiba kum kine ki juh ki jingjia ki la jia ia kiwei pat ki paralok jong u, u la iathuh. Ki arngut ki paralok jong u, u Subhan Uddin na Katirail, Assam bad u A.H Borboya ruh ki la shah kurup ki masi ha ki shipai BSF ha ka 18 tarik utei u juh u bnai ha kaba ki BSF ki la kurup ia ki masi na surok bah bad hadien pat la aiti ia ki sha ki custom ha Umkiang.

Sa uwei pat u samla, uba kyrteng u Pilot Pohkyrnu uba na ka shnong Donaskul, u la wan ban iathuh ha u Mawphor ba ki don kumba 7 ngut ki shipai BSF hapoh ka jingialam u Company Commandant, , Ratacherra BOP, u MZ Khan bad ha ryngkat u Devendar Singh- Inspector, bad ka kynhun jong u ki la wan sha shnong bad rah ia ki 4 tylli ki Muid jong u.

“Kitei ki muid kidei kiba nga la ri bad la dep ruh ban iathuh sha ki BSF naduh mynshwa, hynrei haba nga mut ban pynsngewthuh ia kitei ki BSF kim shem sngap satia. Nga bad katto katne ki rangbah ki la leit ia kynduh ia u heh jong ki ha Umkiang, hynrei kim shah ia kita ki paralok ban rung lang bad nga, bad haba nga rung marwei shapoh BOP jong ki, ki la kylli bad tohkit ia nga bun jait”, u la ong.

Utei u samla u la iathuh ruh ba kadei ka jingshisha ba ka kam shallan be-ain ia ki masi sha Bangladesh lyngba katei ka thain ka long kaba jur bha, hynrei teng teng ka don ka khep ba ki riew paidbah ba luilui kiba ri masi bad muid ban rep lyngkha ki ngat ei ha ka jingeh namar ki BSF ki tharai beit ba kitei ki jingri ki dei kiba thmu ban shallan sha Bangladesh.

Bunsien ka ju long ka rukom ba ki nongkhaii masi kiba ju shallan tuh ia ki masi sha Bangladesh, ki ju pyni ha ki Transits Challan jong ki trok ba ia ki masi kiba ki kit ki dei na ka bynta ban shallan sha Assam bad Mizoram, hynrei tang poi pat ha Lumshnong, Kuliang, Donaskul bad ha Rattachera ki la pynhiar noh ia kitei ki masi bad pynkam shiliang pat ia ki sha Bangladesh.

Halor kane haba kylli na u Abdul, u la iathuh ruh ba ha bakit ia ki masi, ka jinglut ka long kaba heh naba ha man kawei pa kawei ka Police station lane Police Outpost naduh na Ummulong, Jowai, Ladrymbai, Khliehriat, Lumshnong bad Umkiang ki hap ban siew 100 haduh 200 tyngka uwei u masi. “Lada ngi kit 16 tylli, ngi hap ban siew haduh 1600 lane 3200 tyngka bad tang ha ki Pulit ha Jowai kaba ngi ju siew 500 tyngka shi trip”, u la iathuh haba u la phone sha u Mawphor ban iathuh ia kitei ki jingeh jong u ha kaba iadei bad ka jingleh jong ki BSF.

 Web Site Designed and Maintained by SSNetCom Pvt. Ltd.