Thursday September 9, 2010
Shillong Edition

By Our Reporter

Shillong, Lber: U Special DG, ki shipai BSF, u R.K Medheka mynta ka sngi un sa leit hiar jurip sha Muktapur bad ha kiwei kiwei ki jaka kiba shahktah na ka jingiasiat kaba la mih hapdeng ki shipai BSF bad ki shipai BDR bad sngap ia ka jingeh kaba ki paidbah nongshong shnong ha katei ka thaiñ khappud ki shah ktah.

Haba kren ha ki nongthoh khubor hadien ka jingia kynduh kaba kyrpang ia u R.S Mooshahary, Lat ka Jylla, u Medheka, u la pynpaw hi ia ka daw kaba kongsan kaba mih kat haduh ba kine ki shipai iada khappud jong kine ki ar tylli ki ri kin iasiat ka long tang na ka daw ka jingbym lah satia ban iapynbeit ia u pud u sam uba biang hapdeng kine ki ar tylli ki ri.

“Ka jingjia ha Muktapur bad kiwei kiwei ki shnong kiba marjan ka dang long tang ka jingjia kaba rit bad ka jingeh kaba ki paidbah ki iakynduh dei tang namar ka jingiakam trai ia ka khyndew hapdeng kine ki nong shong shnong jong kine ki ar tylli ki ri,” u la bynrap.

Haba kylli halor ka jingweng noh ia ka jingpahara na Amlympiang, u Medheka u la iathuh, “ngi don borabor ha khappud ban ai jingiada ia ki paidbah nong shong shnong bad iada ia u pud u sam jong ka ri, hynrei ka jingweng noh ia ki shipai na Amlympiang ka dei tang ban pynthymmai bad pynbha shuh shuh ia ka jingpahara ha khappud.” “Ngin ym weng noh ruh da lei lei ruh ia ki shipai na kitei ki shnong hynrei ngin dang pynkhlaiñ bad kham pynbun shuh shuh nangne shakhmat ia ki Border Out Post (BOP) ban kham pynsuk ia ka jingtreikam ha khappud,” la ong utei u heh ki shipai BSF.

Na ka liang jong u la banjur ba lada ka Sorkar kan lah ban pyndep kham kloi ia ka jingker sainar shia ha khappud, khlempep ia ki jingiakynad bad ia ki jingiakam trai ia ki jaka ki puta hapdeng kine ki ar tylli ki ri yn sa lah ban weng noh shen.

U la iathuh ruh ba ka jingleit khwai dohkha jong ki paidbah Muktapur na Kympleng ka long ruh namar ba katei ka jaka ka dei kaba hap hapoh u pud u sam jong ka ri India ym sha ka Bangladesh.

Na ka liang jong u, u la kyntu ruh ia ki paidbah khappud ba kim dei satia ban sheptieng namar ki shipai BSF ki long kiba la pynkhreh ban ai jingiada kaba paka lada jia kano kano ka jingiakhun ka ban mih bad ki shipai BDR.

 Web Site Designed and Maintained by SSNetCom Pvt. Ltd.