Thursday September 9, 2010
Shillong Edition

By Our Reporter

Nongstoin, Lber : Wat lada kumba 80 na ka 100 ki briew ha ka jylla kidei ki nongrep, hynrei ha kiba bun ki jaka ki briew kim pat da tip bha ia ka rukom rep katkum ka juk ba mynta bad ka rep jong ki ka long beit shi sur shi dur.

Hynrei da ka jingtrei shitom ki ophisar ka tnad jong ka rep ka riang, mynta kiba bun ki jaka ha nongkyn dong ki la sdang ban sngew thuh ia ka jingkordor ka rep ka riang, ha kaba kim pylleit jingmut shuh tang ha ka rep kpa, hynrei ki la phai ruh sha ka rep jhur.

Ia kane ka la lap ha ka ‘Press Tour’ jong ki lad pathai khubor bad ka tnad DIPR sha Nonglwai, ka shnong kaba don ha surok na Nongstoiñ sha Rangblang, West Khasi Hills.

Katkum ka jingiathuh i Kong B.Mukhim, Horticulture Extension Officer jong ka West Khasi Hills, ki nongrep ha Nonglwai, haba ki rep kba ha ki lyngkha jong ki, tang shu ladep ot ia u kba, ki la shu iehnoh kumto khlem thung eiei shuh ha ki lyngkha jong ki. Na ka liang ka tnad Horticulture, haba ka la iohi ia kane, lyngba ka technology mission, ka la hikai ia ki nongrep ban sdang noh da ka rep jhur ha ka por bym pat dei ka aiom rep kba. Lyngba kane, mynta kumba 100 ngut ki nongrep ha kane ka shnong ki la lah ban rep jhur bad kylla long ruh ki nong khaii jhur ha Iew Nongstoiñ bad wat shaduh Shillong.

I Kong Mukhim, i la iathuh ba ka tnad treikam jong i, ka ai jingiarap 13 hajar tyngka shi hectare ia uwei uwei uwei u nongrep, tangba ka kam ai da ka pisa, hynrei da ki symbai jhur. Nalor kata ka iarap ruh ban pynshna ia ki pung um, namar kane ka jaka ha ka por tlang ka duna bha ka um.

Ki jhur kiba kham mih bha ha kane ka shnong ki long u Kajor bad u Kubi bad ki don ruh kiwei pat ki jhur kiba mih kum u Motor, u Sohkhia bad kiwei kiwei.

Na ka liang ki nongrep kiba la seng la ka jong ka kynhun, ki la pynpaw ka jing sngewnguh ia ki bor sorkar kiba la iarap ia ki ban nang pynbha shuh shuh ia ka rukom rep bad khamtam eh ka jingialam lynti ia ki ban pynioh ia ka rukom rep kaba baroh saw aiom. “Baroh shi katta, haba ngi rep jhur ngi shu rep tang ha ki kper iing ban bam ialade, mynta pat ngi la lah ban rep ha ki lyngkha jong ngi”, la ong uwei na ki nongrep.

Hynrei ka jingeh jong ka jingtyrkhong um ka dang long u mawjynthut ia ka kam rep jong ki bad kumta ki kyntu ia ki bor sorkar ban pynioh um sha ki lyngkha rep jong ki, namar ba ka Wah Kynshi ka jngai tang kumba shi kilometer na ki jaka rep jong ki.

 Web Site Designed and Maintained by SSNetCom Pvt. Ltd.