Thursday September 9, 2010
Shillong Edition

By Our Reporter

Shillong, Lber : Ka kynhun Myntri jong ka sorkar Jylla hynne ka sngi ka la shim ia ka rai ban aiti noh sha ka Meghalaya State Electricity Board (MeseB) ia ka 280 MW Myntdu-Leshka Hydro Electric Project Stage - II hadien ba ka la ioh ia ka jingmynjur na ka Empowered Committee kaba peit ia ka Bording.

U Dr. Mukul Sangma, Myntri ka tnad Bording haba pynbna ia ka rai ba la shim ha katei ka jingialang ki Myntri u la iathuh ba ka jingaiti noh ia ka Leshka Stage - II ha Jaiñtia Hills sha ka MeSEB kadei namar ka jingihun ia ka rukom pyntrei jong ka ia ki projek pynmih bording. “Ka MeSEB ka la kotbor ban pyntrei ia ka Leshka Stage - II kumba la iohi na ka jingpyntrei ia ka Leshka Stage - I” u la ong haba kren bad ki nongthoh khubor hynne ka sngi.

Shuh shuh u la bynrap ruh ba tad haduh mynta kim pat lah ban tip ia ka jinglut ban pyntrei ia katei ka projek pynmih bording. “Ia katei yn sa tip tad haduh ban da dep pynkhreh ia ka Detailed Project Report” u la ong.

Kum ban shu pynkynmaw, ia ka Leshka Stage-II la aiti ha ka SEW Energy Ltd ban pyntrei hynrei katkum ka rai jong ka kynhun myntri hynne ka sngi la pynneh noh tang ia ka Riangmaw bad ka Nongrang Hydel project kiba don hapoh 100 MW .

Na ka liang jong u Myntri ka tnad Urban pat, u Bah Prestone Tynsong u la iathuh ba donkam ban peitbniah biang ia ka soskular ba la ia soi hapdeng ka Shillong Municipal Board bad ka kompany HM Cement Pvt. Ltd. ha shwa ban pyntrei ia ka Municipal Board Complex ha ka nongbah.

“Ka soskular ba la soi mynshwa ka long tang hapdeng ka Board bad katei ka kompani da kaba iaid lait ia ki tnad ka sorkar jylla kynthup wat ia ka Revenue ruh” u la ong bad bynrap ba dei na katei ka daw ba ka sorkar ka kwah ban peitbniah biang shwa ia ka soskular.

U Myntri Rangbah ka Jylla u Dr. DD Lapang u la iathuh ruh ba ka sorkar Jylla kan iaid shakhmat ban pyniasoh noh ia ka Meghalaya bad ka Assam lyngba ka lynti rel kaba thymmai , kata na Tetelia ha Assam sha Byrnihat kaba ha Ri Bhoi District Meghalaya.

Ka Myntri jong ka tnad pule puthi, ka Kong Ampareen Lyngdoh ka la pyntip ba ka kynhun myntri ka la mynjur ban pyntrei kam noh ia ka jingsiew ba thymmai ia baroh ki nonghikai jong ki 384 tylli ki Govt. Upper Primary.

“Na ka bynta ki assistant teacher ka tulop ka la kiew sha ka T.6000/- katba na ka bynta ki Head Teacher sha ka T.7000/-” ka la iathuh bad bynrap ruh ba nangne shakhmat yn don noh tang ar tylli ki jait skul, kata tang ka Government Upper Primary School bad ki Adhoc Upper Primary School ha ka Jylla. Shuh shuh ka la ong ruh ba ka sorkar ka la mang ia ka jingiarap pisa (grant) kaba long T.25,000/- ia man la kawei pa kawei ka skul.

Ha katei ka jingialang ki kynhun Myntri la shim ruh ia ka rai ban pdiang ia arngut ki doktor kiba dei na ka Jylla ki bym dei pat na ka bhah pule ka sorkar ban trei ha ka jylla khnang ban tehlakam ia ka jingduna doktor ha ki PHC bad CHC.

Katkum ka jingiathuh jong u Myntri ka tnad ka Koit ka Khiah, kitei ki arngut kidei kiba pyndep ia ki jingpyntbit na Nepal College of Medical Science bad iwei pat na Ukraine

 Web Site Designed and Maintained by SSNetCom Pvt. Ltd.