Monday September 6, 2010
Shillong Edition

By Our Reporter

Shillong, Lber: Ka kynhun ki nongrep kiba don hapoh ka lama jong ka Ri-Bhoi Farmers Association AMRIT Company (RBFAAC) mynta ka sngi ki la leit ban iakynduh ia Bah Mansturdy Nongrem, Chief Executive Member ka Khasi Hills Autonomous District Council (KHADC) ban dawa na u ba um dei satia ban pynduh noh ia ka Trading Licence ba katei ka Ophis ka la dep ai sha ka Amrit Company.

Ha kane ka jingleit iakynduh jong ia u Bah Mansturdy Nongrem hynne ka sngi ha Ophis treikam jong u ban dawa na u ba ka KHADC kam dei satia ban pynduh noh ia ka Trading Licence ba la ai sha ka Amrit Company ka long halor ka nongrim ba ki la ioh bun ki jingmyntoi da ka jingwan katei ka Kompani.

Haba kren ha ki nongthoh khubor, u Bah F. Nongkhlaw, u la iathuh ba da ka jingwan katei ka Kompani ka la wanrah jingkylla ia ki paidbah nongrep khamtam haba ki la im ja na ka kam ri syiar da ka jingiarap jong katei ka Kompani. U la iathuh ruh ba naduh ba katei ka Kompani ka la wan iuhkjat ha Ri-bhoi, kiba bun hi ki nongrep kiba wan na ki longing kiba duk ki la lah ban ieng ha la ki jong ki kjat.

U Bah Nongkseh u la iathuh ba na ka liang jong u Chief Executive Member ka KHADC, u la kular ia kitei ki nongrep hynne ka sngi, ka da lei lei ruh em ka KHADC kam lah satia ban pynduh noh ia katei ka Trading Licence ba ka la dep ai lyngba ka Trade Department. U la ong ruh ba u CEM, u la iathuh ruh ha kitei ki nongialam katei ka kynhun ba, ‘shwa ba ka KHADC kan ai ia ka Trading Licence sha ka Amrit Company ka la dep bishar nadong shadong ia ki kot ki sla ia kiba ka KHADC ka la pan.

Haba phai sha ka jingiohnong ba kitei ki nongri syiar ki la ioh na katei ka Kompani, u Bah Nongkhlaw, u la iathuh ba naduh ba katei ka Kompani ka la wan iuhkjat ha Ri-bhoi kiba bun ki longing ki la ioh jingmyntoi.” “Hadien baladep iateh soskular bad katei ka Kompani, na ka liang ka Kompani ka pynbiang ia ki syiar, ki jingbam, ki dawai ki dashin bad baroh ki jingdonkam, hynrei na ka liang jong ngi, ngi hap ban shna tang ia ka sem bad siew hi ka bai bording ilektrik bad sumar ia kitei ki syiar kiba da ki hajar tylli,” la bynrap u Bah Nongkhlaw.

U la iathuh shuh shuh ba katei ka Kompani ka ju phah ruh man la ka sngi ki nongwan peit wan jngoh ba ka thung da ki trai jylla ia ka jinglong jingman jong kitei ki syiar kaba long ruh kum shi bynta ka jingai kam ai jam sha ki samla trai jylla.

Ki katto katne ki nongri syiar kiba ladep iateh bad katei ka Kompani, ki la iathuh ba ki hap ruh ban ai ia ki zerox copy jong ki kot ki sla khyndew kum ban pynshisha ba ki don ia ka jaka bad ba kim lah satia ban leh thok ia katei ka kompani.

Haba pyrshang ban kylli, hato lada jia ba ka don ka khlam syiar kaei ka jingiakut bad ka Kompani, na ka liang jong ki, ki la iathuh ba ka Kompani ka kloi ban kyrshan jingiarap lem bad ha kaba iadei bad ka jingpyniaid iew ia ki syiar la leh hi da ka Kompani bad ai ia kitei ki nongri syiar da ka bai rneng na kaba ki ri katkum ka jinglah ban pynim ia ki hajar tylli ki syiar.

Kitei ki nongri syiar ki la iathuh ruh ba ka dor ba ki la iakut bad ka Kompani ba kan siew bai rneng ia ki ha kaba bun na ki nongri syiar ki la im kamai jakpoh jin haduh phra ne khyndai hajar ha ka shibnai.

La iathuh ruh ba kiba bun ki nongri syiar, 70% hi ki dei ki kynthei katba ki shynrang ki shu iaktaid lang malu mala ha ki kam kiba kham heh hynrei kaba bun la leh hi da ki kynthei.

Na ka liang jong u Bah D. Sylliang, President ka Meghalaya Poultry Farmers and Welfare Association (MPFA) u la kynthoh beit beit ba katei ka kynhun kiba ioh jingmyntoi na ka Amrit Compani ban iakynduh ai u CEM mynta ka sngi, ki dei tang ki nongbam syiar ym ki nongri syiar.

U Bah Sylliang u la iathuh ruh ba ha ka jingleit iakynduh ia u CEM mynta ka sngi, u la kular ba un sa phah ia baroh ar tyli ki dorkhar ba u la ioh pdiang na kitei ki ar tylli ki kynhun sha ka Trade Department ban bishar bniah shwa ban shim ia ka rai hadien. U la ong ruh ba ka kynhun jong ka Ri-bhoi Farmers ki dei tang kiba la shu tam na surok bad siew ia ki da ka bai sngi da ka Kompani.

 Web Site Designed and Maintained by SSNetCom Pvt. Ltd.