Monday September 6, 2010
Shillong Edition

By Our Reporter

Shillong, Lber : Ka rai ban kyndang naphang ia ki khyrdop be-aiñ ha ki surok National High way da ka Sorkar Meghalaya United Alliance (MUA), la kynnoh ba ka la shu long tang kum ka jingkyrhuh u ‘Pyrthat Rkhiang’ kaba khlem kohnguh satia da ki bor pyniaid District.

U Bah D.D.Lapang myn ha ka sngi thohdieng ula pynmih ia ka hukum ban phah kyndang lut phar ia baroh ki khyrdop be-aiñ bala pynieng ha ki surok National Highway bad ula bthah ia baroh ki Deputy Commissioner bad ki Superintendent of Police ba kin leit pynpra ia kine ki khyrdop baroh hapoh ka 15 tarik, kaba kut hynnin ka sngi.

“Ka hukum u CM kala long tang ha ka kot khubor, ki khyrdop lum khajna be-aiñ bad ki Weight Bridge be-aiñ kim shym la shah rat satia khamtam ha NH-62 bad ka surok Shallang- Athiabari” ong u Bah A.Shanpru General Secretary ka synjuk All North East Commercial Truck Owners & Operators Association (ANECTOOA) haba iakren bad ki lad pathai khubor. Ka Joint Committee hapoh ka jingialam ka ANECTOOA kala leit iakynduh biang hynne ka sngi ia u Lat ka Jylla R.S.Mooshahary bad aiti ia ka dorkhas kaba iasyriem bad ka dorkhas ba ka synjuk kala aiti sha ka Sonia Gandhi Chairperson ka United Progressive Alliance (UPA).

U Bah Shanpru u iathuh ba ka ka Joint Committee ki 8 tyli ki Seng Trok kala shim mynta ia ka rai ban sangeh hi noh shisyndon ia ka jingsiew khajna sha ki khyrdop ba don ha kylleng ki surok National Highway la ki dei jong ka Transport Department, DMR, Taxation ne ki District Council. U ong, la mynjur lang kawei ba ki trok kin siew khajna beit tang shisien kata ruh tang ha ka Sales Tax bad DMR ha ka jaka mih (Exit) ki trok napoh ka Jylla. U ong, ki trok kin nym leit thew shuh ha ki Weight Bridge bad kin nym sangeh shuh ha ki lynti iaid jong ki.

Ka long kaba sngewsih ba haduh mynta mynne ki khyrdop be-aiñ ki dang don hapoh ki NH. U ong, ha surok Shallang-Rongjeng ba 20 km, ki don haduh 6 tylli ki khyrdop tang ha Nongshram ba kynthup ia ka KHADC ba khrong 300 tyngka shitrok, 2 tylli jong ka GHADC ba khrong 800 bad 300 tyngka shitrok, ka MBI pollution test point ba khrong 3700 haduh 4200 tyngka shitrok, ka Forest bad DMR. U ong, ka gate MBI kam ju ai certificate satia bad ula pyn paw ia ka jinglyngngoh ba ka Forest Dept ruh kala lum khajna na ki trok dewiong nalor ka jingbym ai receipt.

U Bah Shanpru ula ong, ha Nongdaju ruh ki don ki Weight Bridge jong ka Transport Depot kaba la lum haduh 300 tyngka shitrok bad kumjuh ha 3 kilo, Riangdo kaba lum haduh 1500 tyngka shitrok. Ha Demphrup ruh ki don ki khyrdop bad kumjuh ha Athibari kaba lum 1500 tyngka shitrok.

U Bah Shanpru ula ong ba ka hukum jong ka Sorkar kam shym la treikam satia bad ula kyntu ruh ba ka dei ban shimkhia ban khang noh shisyndon ia kine ki khyrdop bad ban tohkit ia ki khyrdop bala iohbor ruh jong ki tnad treikam bapher bapher namar ka jingoh palat dor bad ruh ka jingkhrong khajna kulmar kumba ula kdew ba ka Forest ka lum ia u dewiong.

U K.Marak President ka Nongalbibra Coal Merchant Association (NCMA) ula ong ba watla ka sorkar kala pynmih ia ka hukum hynrei ka jingkhrong khajna be-aiñ ha NH-62 ka long beit kumjuh ba kynthup ruh ia ki khyrdop ka DMR bad Taxation. U ong, ka Sorkar ka dei ban pyni beit noh da ka kam bad ai jingmut ba kan pyntreikam noh da ka single window system khnang ban lah pynduhjait ia kane ka jinglum khajna be-aiñ.

 Web Site Designed and Maintained by SSNetCom Pvt. Ltd.