Monday September 6, 2010
Shillong Edition

By Our Reporter

Shillong, Lber : U Ksiang iakren iasuk ka Sorkar Kmie, P.C.Haldar ula pynpaw ia ka dak ba don jingkyrmen ban seisoh ka jingdawa Garo Hills Autonomous Council jong ka Achik National Volunteer Council (ANVC) hynrei u ong kane kan shong ha ka jingiapynbeit bad ka Sorkar Kmie bad kumjuh ruh ka Sorkar Jylla.

U Haldar ula iakynduh ia ki Nongialam ka ANVC hynne ka sngi ha Pinewood Hotel ban iakren halor ki mat dawa jong kane ka kynhun kaikhlaw ba don ha ka ‘sangeh iasiat’ ka ban kut noh ha ka 31 tarik Lber. “Ka jingialang jong ngi ka long beit tang halor ki mat dawa ka ANVC bad ka jingialang ka long kaba seisoh” ong u Haldar haba iakren bad ki lad pathai khubor. Ula ong, ka jingiakren ka dang shu sdang hynne ‘ngam pat lah ong kaei ka jingmih bad kaei kaban urlong’. Ula ong ka jingia kren kan dang iai bteng tad haduh ban da shim ia ka rai ba khatduh.

Haba kylli halor ka mat sangeh iasiat ka ban kut noh ha ka 31 tarik Lber, u Haldar ula ong ‘ngi khlem iakren eiei ruh em ia kane ka kam. Kane kam dei ka Joint Monitoring Group (JMG) hynrei kaba ngi iakren ka long beit thik tang ia ki mat bala dawa da ka ANVC na ka sorkar ”. U iathuh ba ka jingiakynduh kaba ar jong u bad ka ANVC kan sa long ha shuwa jong ka 31 tarik Lber.

Ki Nongialam ka ANVC kiba la wan sha ka jingiakren hynne ka sngi ki long u Wanding Marak General Secretary, u Arist Sangma Publicity Secretary bad u Torik Jangning Marak Nongaiktien uba dei ruh u Chief Organising Secretary. Na ka Sorkar Jylla la mihkhmat da u Bah C.D.Kynjing Principal Secretary.

U Torik.Jangning Marak Nongaiktien ka ANVC ula ong ba ka jingiakren hynne ka long kaba biang bad “ngi sngewdei ba kan iai bteng bad ngi kwah ruh ia ka jingkular na ka Sorkar Kmie ba kan shimkhia ia ka jingiakren halor ki mat dawa”. U ong, ka jingiakren ia ka Garo Autonomous Council kam pat biang satia bad donkam ban iashong biang na ka por sha ka por.

Haba jubab ia ka jingkylli balei ka ANVC ka bujli ia ka jingdawa Garoland sha ka Garo Autonomous Council, u Torik ula ong ka ANVC kam kwah ba ka jingiashongsuk hapdeng ki 3 Jaidbynriew paid riewlum ka Meghalaya kan thut. U ong, ka jing dawa Garo Land kan ktah bha bad wanrah ia shibun ki jingma. U ong kawei pat ka long ba ka jingdawa Garo Autonomous Council ka long kat kum ka Riti Synshar. Ula ong, wat ki paidah Garo bad bun ki Politician kila kyrshan ia kane ka jingdawa bad iaroh ia ka ANVC ba kala leh ia kaba dei eh.

Haba kylli halor ka jingkut noh ka soskular sangeh iasiat la 31 tarik Lber, u Torik ula ong ba ka ANVC ka dang kwah ban bteng ia ka soskular sangeh iasiat bad ki paidbah ha Ri-Lum Garo ruh ki angnud bha ia kane hynrei u ong pat ba ka ANVC mynta kan buh ka jingdawa ba ka jing sangeh iasiat kan nym long shuh ka soskular ba khlem buh por (Indifinite) hynrei kan don da ka samoi (Periodic Agreement) khnang ban iohi ia ka jingiashimkhia na ka liang ka Sorkar ia ki jingiakren iasuk bad ba ka seng ruh kan nang ban pynkhreh ialade ia kaei ka ban jia.

U Torik ula ong, ka JMG kan sa shong halor kane ka soskular sangeh iasiat bad dei ma ka, ka ban rai ia ka jingnang pyn jlan ia ka jingiasangeh iasiat hapdeng ka ANVC ka Sorkar Kmie bad ka Sorkar Jylla.

U Bah C.D.Kynjing Commissioner Secretary ba mihkhmat ia ka Sorkar Jylla ula ong, ka jingiakren ka long kaba poi sha ka jingiasngewthuh jingmut bad kan nang iai bteng tad haduh ban da lah iabeit.

 Web Site Designed and Maintained by SSNetCom Pvt. Ltd.