Friday September 3, 2010
Shillong Edition

By Editor

Ka jingkyrduh bording elektrik hapoh ka jylla Meghalaya mynta ym lah ban len ba kadei kawei pat ka jingeh kaba la wan tyllep. Ia kane ka jingeh ngim ju lah satia ban sngewthuh lypa ha ki por kiba la leit noh kata dang tang ha ki san snem mynshuwa. Hynrei kane mynta ka la ieng ha ka tyngkong iing jong ngi. Ka jingbymbiang ka bording elektrik ym tang ba ka wanrah jingeh ia kane ka juk Technology mynta, hynrei kawei na ki jingeh kaba kham donkam eh kata ka long ka jingduna jong ka jingshong shngain. Namar ka jingbymlah ban pynbiang ai ka bording Elektrik hapoh ka jylla kumba ju long baroh shi katta ka la pynlong ia ki bor ba dei peit ba kin pynlip ia ka ding eletrik man ka miet kumba la buh beit da ka tnad ba dei peit. Ka jingpynlip ding ba man la ka miet ka la wanrah ia ka jingshong syiere ha ki shnong ki thaw namar jong ka jingshim kabu jong ki riew sniew.

Ka long kaba eh shibun ban pynneh ia ka jingshong shngain lada kam don ka jingshai hapoh ka shnong ka thaw, ha ki iing ki sem. Lada jia ei ei ha ka por jong ka kynta ba pynlip ding bun kim shlan ban mih shabar. Kawei na ki jingeh ka long ba ym lah satia wat ban iohi ia ki riewsniew ha ka jingdum jong ka miet. La iohi ha kine ki khyndiat sngi ba ka la don ka jingshim kabu ha kiba bun ki dong ba ki longiing da ki riew sniew. Ki la don bun ki kynhun nongtuh kiba la nud ban rung sha ki kompon iing briew bad ban pyrshang ban leh ai ki kam pyntriem. Dangshen ki paidbah jong ka Dong Misison ki la ioh ban kem ia uwei u nongtuh uba la leh ia katei ka kam pyntriem, hynrei u ne ruh u la lait noh na ka kti jong ka ain.

La iohi ba ki dong ki shnong bad ki dong kiba la pyrshang ban pynlong da ka jingap miet na ka bynta ban iada na ka jingsniew. Hynrei haduh katno ngin lah ban iai bteng ia kane ka kam.Kawei kaba ngi lah ban iohi mynta i mat ka don ka jingiadon kti wat jong ki briew kiba na kato ka shnong hi ha kaba leh ai ki kam pyntriem. Namar kata ki paidbah ki donkamban long kiba husiar bha khnang ba ki riewsniew kin ym ioh ban shim kabu. Ka jingjyllei ki riewsniew kiba shim kabu ha ka kynta jong ka por pynlip ding, ym tang ba ka long kaba pyndik hynrei kane ka lah ruh ban wanrah ia ka jingma wat ai ki mynsiem bakordor ruh. Namar lada kadon kano kano ka jingialeh ym banse ban leh kat kaba idonkam.

Kumba lah ban iohi ha kine ki sngi, la iohi ba ki don ki dong kiba ki nongtuh ki jur bha bad ki dong pat kiwei pat i shnong kiba shong suk shongsain. Ha kaba iadei bad kumno ban teh lakam ia kane ka kam, ki bor synshar shnong ki don ka bynta ban peitngor bha ia ki briew kiba wan ban buhai shnong thymmai ban ym ailad ia kito kiba i artatien ban ioh phrung khlieh hapoh ka shnong. Namar kamba ka long mynta hi dang bun ki shnong kiba ki briew ki lah ban leit shongwai laitlan beit khlem kano kano ka jingtehkyndon ne kylli bniah ia ka jinglong jong ki ne ka shnong kaba ki wan. Ym tang kane hynrei ki briew kiba sniew ki dei ruh kito kiba na ki dong ne ki shnong ba marjan kiba tip ia ka rukom long jong ki longiing longsem.

Ka jingpynlip ding ka ailad shisha ia ki briew kiba sniew ban iaid laitlan ha ki por dum jong ka miet. Kumta i mat ka bor ba peit ia ka jingpynlip ding ne ka MeSEB ka la dei ban pynkylla noh ia ka rukom pynlip ding ha ka por mynmiet. Lada yn pyrshang ban pynmih noh khyndiat khyndiat tharai kam iarap mo. Kane la long ban ailad ia ki longiing ban ioh jingshai khyndiat khyndiat ha ka por miet lada don kano kano ka jingjia kaba sngewsih yn lah ban kham ioh jingiarap.Namar lada ka bording la lip shipor meh shipor ki riew sniew kin ym nud eh ban shim beit ba kin ioh ban leh mon baroh shi miet ha ki kynta jong ka por pynlip ding.

Kumjuh ruh lada na ka liang jong ki bor pyniaid shnong ki thmu ban pynlong ia kano kano ka jingap miet kan kham bha ba kin leh jar jar khnang ba ki riew sniew kin ym tip lypa. Bun ki riew shim kabu ki tip bha mano ba dei ap shnong ha ki por mynmiet. Lada kane kan dang iai bteng ka sorkar ka la donkam ban pynioh noh ia ki jingiarap khnan g ba baroh ki shnong kin ioh la ki jong ki VDP na ka bynta ban pahara ia ka shnong. Ka jingioh pat ia ka jingshngain ha ka shnong ka thaw kan long pat ka bynta jong ka jingshongsuk shongsain na lym kumta kaei kaei kaba shyrkhei ka lah ban jia.

 Web Site Designed and Maintained by SSNetCom Pvt. Ltd.